АСТАНА. KAZINFORM - Италияның Кастелламмаре ди Стабиа қаласында өтіп жатқан Еуролига аясында (EBSL 2025 – Euro Beach Soccer League) Қазақстан құрамасы алғашқы екі ойында жеңіске жетті.
Қазақстандық футболшылар В дивизионында Румыния, Норвегия және Мальтамен сынға түсіп жатыр.
Доп додасы барысында ел құрамасы алдымен Румынияны 3:2 есебімен тізе бүктірді. Бұл ойында Артур Деринг, Айдын Мәліков, Михаил Кайзер мергендік танытты.
Ал бүгін ел құрамасы Норвегиядан 6:4 есебімен басым түсті. Бұл жолы Артур Деринг, Михаил Кайзер, Әбдіқадыр Құрбанов, Алан Мыңбаев, Владислав Шевчук көздеген нысанадан мүлт кеткен жоқ.
Енді отандастарымыз алдағы ойынын 27 шілдеде Мальтаға қарсы өткізеді.
Жарыс алдында ұлттық құрама 20-24 шілде аралығында оқу-жаттығу жиынын өткізді.
Ұлттық құраманың аға бапкері міндетін Артем Ерохнович атқарады.
Еске салсақ, жағажай футболынан Қазақстан ұлттық құрамасы былтыр Еуролиганың топ-дивизионына өтті.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.