АҚТӨБЕ. ҚазАқпарат - Ақтөбеде жаңа жыл түні үй өртеніп, отбасы далада қалды. Қалалық жұмыспен қамту және әлеуметтік бағдарламалар бөлімі бұл жанұяға бір жолғы көмек береді, деп хабарлайды ҚазАқпарат тілшісі.
"Бізге үйі өртенген отбасы келді. Оларда өрт болғаны туралы анықтама жоқ. Алдымен анықтаманы қай мекемеден алатыны жөнінде ақпарат берілді. Біз бір жолғы көмек ретінде 100 мың теңге бере аламыз. Көмек комиссия шешімі шыққан соң беріледі", - деді қалалық жұмыспен қамту мен әлеуметтік бағдарламалар бөлімінің басшысы Мақпал Тұрмағамбетова.
Еске салсақ, Ақтөбе қаласындағы саяжайлардың бірінде 31 желтоқсаннан 1 қаңтарға қараған түні үй өртенді. Жалғыз баспанасынан айырылған 7 жан қазір тума-туыстарының үйін жағалап жүр.
Алтынай Сағындықова
2001-2006 ж.ж. Қ.Жұбанов атындағы Ақтөбе мемлекеттік университетін тәмамдады. Мамандығы - журналист. Еңбек жолын 2006 жылы "Kerek.info" қоғамдық-ақпараттық газетінен тілші болып бастап, шеф-редактордың орынбасары, шеф-редактор болды. Әртүрлі жылдары "Айқын" қоғамдық-саяси газеті, Bnews.kz, Aktobenews.kz тілші қызметін атқарды. 2017 жылдан бастап Kazinform агенттігінің Ақтөбе облысындағы меншікті тілшісі.