ЖАҢАҚОРҒАН. ҚазАқпарат - Қызылорда облысы Жаңақорған ауданында тыйым салынған 185 түп сора өсімдігін өсірген 2 тұрғын қолға түсті, деп хабарлайды ҚазАқпарат тілшісі.
Есірткі алқабы Жаңақорған ауданының Төменарық елді мекенінен 5 шақырым қашықтықта қалың ағаш арасында болған. Жаңақорған аудандық полиция бөлімінің қызметкерлері «Көкнәр» жедел-профилактикалық іс-шарасы барысында аталмыш есірткі алқабын тапты. Сол жерде Қызылорда облысының 25-35 жастағы 2 тұрғыны ұсталды.
«Аталған дерек бойынша ҚР Қылмыстық кодексінің 300-бабының 2-бөлігі сотқа дейінгі тергеп-тексеру амалдары жүргізілуде. Онда құрамында есiрткi заттар бар, өсiруге тыйым салынған өсiмдiктердi адамдар тобымен заңсыз егіп-өсіру жағдайы көрсетілген. Ұсталған азаматтар уақытша ұстау абақтысына қамалды», - деп мәлім етті Қызылорда облыстық полиция департаментінен.
Бұдан бұрын Жаңақорған ауданына қарасты Түгіскен елді мекенінен 45 шақырым жерде есірткі алқабы табылған еді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.