АСТАНА. KAZINFORM — Қазақстандық теннисші, 14 жастағы Аңсар Ниетқалиев жасөспірімдер арасында үш ITF Juniors турнирінде жеңімпаз атанды.
Аңсар алдымен Түркияның Бурса қаласында J30 санатындағы жарыста финалда жергілікті спортшы, доданың 5-ракеткасы Берке Окумусты айқын басымдылықпен ұтты — 6:2, 6:0.
Қарқынын бәсеңдетпеген Аңсар Ниетқалиев бір аптадан кейін Түркияның Адана қаласында дәл осындай турнирде үздік шықты. Ол жұптық сында отандасы Хақназар Жеткербаймен бірге соңғы бәсекеде түркиялықтар Гюлер — Конияны камбэк жасап, тізе бүктірді — 6:7 (5:7), 6:3, 10:8.
Аңсар үшінші жеңісіне туған жерінде қол жеткізді. Ол Алматыда жаңадан ашылған «Алатау» теннис орталығында J60 Almaty Open жарысында үздік шықты. Аңсар Ниетқалиев финалда өзінен әлдеқайда тәжірибелі, тағы бір қазақстандық Олжас Есеналыға мүмкіндік қалдырмады — 6:2, 6:2.
Еске сала кетейік, бұдан бұрын WTA қорытынды турнирінде Елена Рыбакинаның әлемнің 4-ракеткасын ойсырата жеңгенін жазған едік.
Александр Бублик әлемдік рейтингіде жеке рекордына қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).