Бұрын мұндай шараларға Google, Meta сияқты тек технологиялық алпауыттар қолдау көрсетсе, қазір қаржылық сектор да таланттар үшін таласқа түскен.
— Алдыңғы жылы Қазақстанда бір ғана отандық компания, 6 шетелдік компания демеуші болған еді. Қазір керісінше отандық демеушілер басым. Бұл біз үшін нарығымыздың жетіліп, талантты жастарға сұраныстың көбеюін білдіреді, — деді федерация өкілі.
Сонымен қатар Данабек Калиаждаров олимпиаданың Астанаға ауысуы кездейсоқ емес екендігін атап өтті.
— Біріншіден, бұндай жарыстар жаһандық деңгейдегі интеграцияның құралы. Екіншіден, елімізде ЖИ жылы жариялануымен дөп түсіп отыр. Сондай-ақ суперкомпьютердің іске қосылуы және инфрақұрылымның дайындығы халықаралық қауымдастықтың сенімін нығайтты, — дейді ол.
Қазіргі уақытта ұлттық құраманы жасақтаудың шешуші кезеңі жүріп жатыр. 40 үздік оқушының ішінен 15-і іріктеліп алынған. Екі апталық қарқынды дайындықтан кейін тек 8 бала негізгі құрамға енеді.
Еске сала кетейік, бұған дейін, Спорттық бағдарламалау федерациясының жетекшісі Бағдат Мусин Қазақстанда Халықаралық жасанды интеллект олимпиадасын (IOAI) өткізу туралы келісімшартқа қол қойылғанын хабарлаған едік.