ОРАЛ. KAZINFORM — Бірінші лига командалары арасында Қазақстан чемпионатының екінші турында Оралдың «Жайығы» П.Атоян атындағы стадионда «Астана жастарын» қабылдады.Бастапқы турда сырт алаңда «Арысты» 1:0 есебімен ұтқан оралдықтар бұл жолы да білгенінен жаңылған жоқ.
Бірінші таймда команда капитаны Бауыржан Омаров бұрыштамадан берген допты «Жайықтың» жас ойыншысы Айбар Ахмет қақпада тулата білді.
Осы есеп матч соңына дейін өзгерген жоқ — 1:0.
Сөйтіп екі ойыннан кейін 6 ұпай жинаған Вячеслав Невольниковтің шәкірттері бірінші лигада көш бастады.
«Жайық» үшінші турда Алматыда 24 сәуірде «Хан-Тәңірі» командасымен кездеседі.
Еске сала кетейік, бұдан бұрын Оралдың «Жайығы» бірінші лиганың беташар ойынын жеңіспен бастағанын жазған болатынбыз.
Қазақстан кубогында «Қайрат» Оралда «Жайықтан» басым түсті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).