АСТАНА. ҚазАқпарат – Алматыда қаласындағы «Достық» спорт кешенінде волейболдан ерлердің Ұлттық лига командалары арасында ХХХІ Қазақстан чемпионаты бірінші турының ойындары жалғасып жатыр, деп хабарлайды ҚазАқпарат тілшісі.
Жарыстың екінші күні алғашқы болып Оралдың «Жайығы» мен «Есіл-СК» (Петропавл) клубы алаңға шықты.
«Жайық» клубы араға жылдар салып, Ұлттық лигаға биыл қайта оралды. Кезінде ҚР чемпионы атанған Оралдың «Конденсат» командасы 2015 жылы демеушісіз қалып, тарап кеткен еді.
«Жайықты» жаңа маусымда белгілі ойыншы Александр Стольников жаттықтырса, команда Қайрат Байбеков, Петр Чурзин, Евгений Гоф, Қайрат Қаленов, Айдын Әділбеков секілді негізінен Орал волейболының түлектеріне үміт артып отыр.
Кеше «Тараз» командасымен ойнаған оралдықтар тартысты кездесуде 1:3 (31:33, 27:25, 23:25, 15:25) есебімен есе жіберген еді.
Бүгінгі матчта «Жайық» ширақ ойын өрнегін көрсетіп, қарсыластарына дес бермей, 3:0 (25:17, 25:19, 25:18) есебімен жеңіске жетті.
Бірінші тур 10 қарашада мәреге жетеді.
Еске сала кетейік, бұдан бұрын Алматыда ерлер арасында волейболдан ел чемпионаты басталғанын жазған болатынбыз.
Сондай-ақ ел чемпионы «Атырау» суперкубок иегері атанды.
Фото: phonoteka.org
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).