АСТАНА. KAZINFORM — Қазақстандық теннисші Жібек Құламбаева жұптық сында Сабаделе (Испания) ITF W35 турнирінің жартылай финалына шықты.
Қазақстандық теннисші ресейлік Екатерина Казионовамен жарыстың 2-ракеткасы болып тіркелген.
Құламбаева — Казионова ширек финалда аргентиналықтар Орнелла Де Фацио — Маура Йовичпен кездесуі керек еді. Алайда аргентиналық дуэт матчқа келмей қалды да, қазақстандық-ресейлік жұп ойнамастан жартылай финалға жолдама алды.
Ж.Құламбаева — Е.Казионованың жартылай финалдағы қарсыластары кейін анықталады.
Ж.Құламбаева жекелей сында алғашқы айналымда доданың 3-ракеткасы, аустралиялық Астре Шармеге жол берді — 5:7, 2:6.
Тағы бір қазақстандық, рейтингіде 325-сатыдағы Зарина Дияс Анталия (Түркия) челленджер турнирінде әлемнің 131-ракеткасы, Польша өкілі Майя Хвалинскаға есе жіберді — 3:6, 1:6.
Еске сала кетейік, бұдан бұрын Дмитрий Попконың Мексикадағы турнирдің екінші айналымына шыққанын жазған болатынбыз.
Сондай-ақ Александр Бублик Майами мастерс турнирінде рейтингісі жоғары теннисшіні ұтты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).