АСТАНА. KAZINFORM — Қазақстандық теннисші, әлемнің 332-ракеткасы Жібек Құламбаева Лозадағы (Португалия) ITF W35 турнирін сәтті бастады.
Аталмыш жарыс екі апта қатарынан ұйымдастырылып жатыр. Өткен аптада Жібек жұптық сында жеңімпаз атанған еді. Ал жекелей сында екінші айналымда германиялық Катарина Хобгарскиге жол берді.
Бұл жолы қазақстандық теннисші бастапқы кездесуін дүниежүзілік рейтингіде 494-орында тұрған испаниялық Кристина Диаз Адровермен өткізді. Екі сағаттан астам уақытқа созылған тартысты матчта Құламбаева қарсыласының мысын баса алды – 6:1, 7:5.
Жібек Құламбаева ширек финалға шығу үшін әлемнің – 274, осы доданың 7-ракеткасы, аустралиялық Тина Смитпен таласады. Ол рейтингіде 366-сатыдағы франциялық Джули Белграверді жарыс жолынан оңай тайдырды – 6:1, 6:3.
Еске сала кетейік, бұдан бұрын Жібек Құламбаеваның Португалиядағы жарыстың жеңімпазы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).