АСТАНА. KAZINFORM - Қазақстандық теннисші, әлемнің 306-ракеткасы Жібек Құламбаева Курсумлийска Баня (Сербия) ITF W15 турнирінің чемпионы атанды.
Жарыстың 1-ракеткасы болып тіркелген Ж.Құламбаева шешуші бәсекеде дүниежүзілік рейтингіде 751-орында тұрған сербиялық Драганья Вуковичпен чемпиондық атақты сарапқа салды.
Бірінші сетте Жібек 2:0 есебімен алға шыққанымен, корт иесі таразы басын теңестірді – 2:2. Дегенмен Құламбаева тағы бір брейк жасап, сетке доп бергенде, мүмкіндігін жіберген жоқ – 6:4.
Екінші партияда есеп 4:4 болған мезетте Жібек брейк жасай алды. Алайда содан кейін үш матчболын пайдалана алмады. Тай-брейкте сербиялық спортшы 3:0 есебімен алға шыққанымен, Құламбаева бесінші матчболын өз есебіне жазды – 7:6 (7:5).
Тартысты өткен финалдық матч 2 сағатқа созылды.
Еске сала кетейік, бұдан бұрын Жібек Құламбаеваның Сербиядағы турнирде чемпиондық атақ үшін таласатынын жазған едік.
Сондай-ақ Анна Данилина Ұлыбританиядағы жарыста топ жарды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).