ОРАЛ. KAZINFORM – Қазақстандық теннисші, әлемнің 337-ракеткасы Жібек Құламбаева Сербияда өтіп жатқан ITF W75 турнирінің ширек финалына шықты.
Жарыстың 7-ракеткасы болып тіркелген Құламбаева алдымен рейтингіде 480-орындағы корт иесі Аня Станковичті қапы қалдырды – 6:3, 6:2.
Қазақстандық теннисші 1/8 финалда рейтингіде өзінен үш саты жоғары тұрған түркиялық Айла Ақсумен тартысты матч өткізді. Бірінші партияда Жібек қарсыласына дес берген жоқ – 6:2. Екінші сетте бірден брейк жасап, алға шыққанымен, басымдылықты ұстап тұра алмады - 3:6. Дегенмен шешуші, үшінші сетте Құламбаева ойын тізгінін уысынан шығармады – 6:2. Бәсеке екі сағатқа жуық уақытқа созылды.
Жібек Құламбаева жартылай финалға шығу үшін рейтингіде 369-орындағы Мальта өкілі Франческа Курмимен шеберлік таластырады. Қазақстандық теннисші қазіргі кезде WTA Live рейтингісінде 329-орынға көтеріліп тұр.
Еске сала кетейік, бұдан бұрын Елена Рыбакинаның Страсбург жарысының жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).