АСТАНА. KAZINFORM – Қазақстандық, әлемнің 309-ракеткасы Жібек Құламбаева Куршумлия-Баня (Сербия) ITF W35 турнирінің ширек финалына шықты.
Жарыстың 4-ракеткасы болып тіркелген қазақстандық теннисші екінші айналымда дүниежүзілік рейтингіде 487-орында тұрған беларусьтық Юлия Готовконың мысын басты.
Сағат жарымға созылған кездесуде Жібек 6:4, 6:0 есебімен жеңіске жетті.
Жібек Құламбаева жартылай финалға шығу үшін рейтингіде 497-сатыдағы ресейлік Арина Булатовамен таласады. Ол екінші айналымда әлемнің 346-ракеткасы, сербиялық Наталия Сеничті сүріндірді – 2:6, 6:1, 6:0.
Ж.Құламбаева қазір WTA Live рейтингісінде 305-орынға көтеріліп тұр.
Еске сала кетейік, бұдан бұрын Ролан Гаррос турнирінде Рыбакинаның үшінші айналымда 2017 жылғы чемпионмен ойнайтынын жазған болатынбыз.
Ролан Гарроста Александр Бублик сенсация жасап, алғаш рет үшінші айналымға өтті.
Сондай-ақ Юлия Путинцева екінші жеңісіне қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).