«Қаланы қосымша көлемде жылумен қамтамасыз ету үшін өткен жылы екі газ жылу станциясының құрылысы басталған болатын. Елорданы аралау барысында «Тұран» және «Оңтүстік-Шығыс» газ жылу станцияларының құрылысымен таныстым. Олардың қуаты құрылысы ұзаққа созылып кеткен ЖЭО-3-тен асып түседі», - деп жазды әкім Instagram-дағы парақшасында.
Айтуынша, аталған екі газ жылу станциясын биылғы жылыту маусымында кезең-кезеңімен іске қосу жоспарланып отыр.
«Сонымен қатар мердігерге ЖЭО-3 құрылысын биыл аяқтау міндеті жүктелді. Осы шаралардың бәрі жылумен жабдықтау көлемін едәуір ұлғайтуға, сол сияқты болашақта құрылыс жұмысы жүретін аудандарды жылумен қамтуға мүмкіндік береді», - дейді қала басшысы.
Айта кетейік, кеше Мәжіліс депутаты Ерлан Саиров биыл Астана жылусыз қалуы мүмкін деген болжам айтты.
Мәлім болғандай, «Amanat» партиясы жанындағы Сыбайлас жемқорлыққа қарсы іс-қимыл жөніндегі республикалық кеңестің жұмыс тобы Астана қаласының ЖЭО-3 құрылысына партиялық бақылау жүргізген. Оның құрамына Мәжіліс депутаттары, Бас прокуратураның, Астана әкімдігінің, Қаржы мониторингі агенттігінің және Сыбайлас жемқорлыққа қарсы іс-қимыл агенттігінің өкілдері кірді.
«Қоғамдық бақылау туралы» Заңға сәйкес, біз елордадағы ЖЭО-3 құрылысының сапасына бақылау жүргіземіз. Нысанның құрылысы 2010 жылдан бері жүргізіліп келе жатқанын білеміз, бұл – ұзақ процесс. Адамдар Астанада жылудың жетіспейтіндігіне шағымданады. Сондықтан, биыл қала белгілі бір дәрежеде жылусыз қалуы мүмкін деген қауіп бар», - деген болатын кеңес төрағасы, Мәжіліс депутаты Ерлан Саиров.