ОРАЛ. KAZINFORM - Батыс Қазақстан облысы әкімі аппараты ішкі аудит қызметінің жетекшісі Ербол Найзабеков 2024 жылдың қазан айында жол-көлік оқиғасын жасады.
БҚО әкімінің баспасөз қызметінен мәлім еткеніндей, облыстық полиция департаменті оған қатысты ҚР Әкімшілік құқық бұзушылық кодексінің 608-бабына сәйкес әкімшілік іс қозғады. Тиісті сараптамалар тағайындалды.
- Тексеру қорытындыларына сәйкес іс материалдары сотқа жолданатын болады. Мемлекеттік қызметшілердің қызмет этикасы талаптарын бұзғаны үшін Е.Найзабеков қатаң сөгіс түріндегі тәртіптік жауапкершілікке тартылды. Қазіргі кезде ол қызметінен босатылды, - деп хабарлады ведомстводан.
БҚО полиция департаменті баспасөз қызметінің нақтылауынша, осы оқиға салдарынан жарақат алған жәбірленуші қыздың қаншалықты зардап шеккенін анықтайтын сараптама келгеннен кейін іс сотқа жолданады.
Еске сала кетейік, бұдан бұрын Батыс Қазақстанда полиция қызметкерінің автокөлігімен ер адамды қағып өлтіргенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).