Шымкентте шетелдіктерді заңсыз еңбекке тартқан 15 азамат анықталды

Шымкент қаласы аумағында халықаралық “Наёмник” жедел профилактикалық іс-шарасы өтіп жатыр. Әл-Фараби аудандық полиция басқармасы тәртіп сақшылары жалдамалы пәтерлерді, құрылыс алаңдарын, базарлар мен фермерлік шаруа қожалықтарын және шетелдіктер жүруі мүмкін басқа да орындарды күшейтілген режимде тексеруде, деп хабарлайды ҚазАқпарат Оtyrar.kz-ке сілтеме жасап.

Мамандардың айтуынша, мұндағы басты мақсат – заңсыз көші-қон жайттарының алдын алу, оның жолын кесу, құқықтық тәртіпті нығайту және қылмыс санын азайту.

"Жедел-профилактикалық шараның 9 күнінде Қазақстан Республикасының көші-қон заңнамасын бұзғаны үшін 69 шетел азаматына ӘҚБтК-нің 517-бабы бойынша хаттама толтырылды", - деп жазды басқармадан.

Сондай-ақ, шетелдіктерді заңсыз еңбекке тартқаны үшін 15 жұмыс беруші әкімшілік кодекстің 519-бабымен жауапқа тартылды.

Айта кетейік, халықаралық “Наёмник” жедел профилактикалық іс-шарасы 11-30 қыркүйек аралығында жалғасын табады.