1 қаңтардан бастап айлық есептiк көрсеткiш 2 121 теңге болып белгіленді

АСТАНА. ҚазАқпарат - Жаңа жылдан бастап «2016-2018 жылдарға арналған республикалық бюджет туралы» Заң күшіне енеді. 2016 жылдың 1 қаңтарынан бастап жәрдемақыларды және өзге де әлеуметтiк төлемдердi есептеу үшiн, сондай-ақ айыппұл санкцияларын, салықтар мен басқа да төлемдердi қолдану үшiн айлық есептiк көрсеткiш (АЕК) 2 121 теңгеге ұлғайтылды.

Өткен 2015 жылы бұл көрсеткіш 1982 теңге болған.

Бұл көрсеткіш  2015 жылдың 30 қарашасындағы № 426-V «2016-2018 жылдарға арналған республикалық бюджет туралы» Заңға сәйкес белгіленген.

«Әлеуметтік қорғауға бағытталған шығыстар алдағы үш жылда 6 трлн 527 млрд теңгеге жетеді.   Соның ішінде халықты әлеуметтік қорғауға бағытталған шығыстар 2016 жылы 2015 жылмен салыстырғанда 244,6 млрд теңгеге артып, 1 трлн 879 млрд теңгені құрайды»,-деп атап өтті аталмыш Заң жобасын Мәжілісте талқылау барысында ҚР Қаржы министрі Бақыт Сұлтанов.

Естеріңізге сала кетсек, 2015 жылдың 30 қарашасында Мемлекет басшысы Қазақстан Республикасының Бюджет кодексіне сәйкес 2016-2020 жылдарға арналған макроэкономикалық көрсеткіштердің базалық болжамы және Қазақстан Республикасы Президентінің жыл сайынғы Қазақстан халқына жолдауы негізінде әзірленген «2016-2018 жылдарға арналған республикалық бюджет туралы» Қазақстан Республикасының Заңына қол қойды.