13-14 қазанда Жамбыл өңірінде жалпы облыстық сейсмо жаттығу өтеді
Мершиев атап өткендей, жойқын жер сілкінісі кезінде құрбандар мен жарақат алушылар болады, байланыс және тіршілік көздері бұзылады, кезек күттірмейтін және апаттық-құтқару жұмыстарын жүргізуге іріткі салушылар көбейеді, мұндай жағдайлар орын алмас үшін алдын-ала жоспарлаудың арқасында шығынның азаюына қол жеткізуге болады.
Осыған орай, 2016 жылдың 4 сәуірінде облыс әкімімен бекітілген 2016 жылға арналған Жамбыл облысы азаматтық қорғау күштері мен басқару органдарының дайындығы іс-қимылдарының жоспарына сәйкес, 13-14 қазан күндері жалпы облыстық сейсмо жаттығу өткізілетін болады. Сондай-ақ Тараз қаласында «Жамбыл облысы аумағында жойқын жер сілкінісі туындағанда апаттық-құтқару қызметтері күштерінің, басқару органдарының іс-қимылы» тақырыбында командалық оқу-жаттығу өткізіледі.
Жаттығу екі сатыда жүргізіледі. Бірінші сатыда - болуы мүмкін жер сілкінісі туындағандағы іс-қимылдар қарастырылады. Екінші сатыда - жойқын жер сілкінісі туындағанда басқару органдарының, апаттық-құтқару күштерінің іс-қимылы тексеріледі. Мекемелерде, мектептерде, балабақшаларда және денсаулық сақтау мекемелерінде жер сілкінісі туындаған жағдайдағы іс-қимылдар бойынша сабақтар өткізілетін болады.
Жаттығу барысында сонымен қатар, Тараз қаласында практикалық іс-шаралар өткізу жоспарлануда. Атап айтқанда, жәбірленуші халықты жинау пункттерінің жұмысының ұйымдастырылуын тексеру, ғимараттарда өрт болған жағдайдағы апаттық-құтқару жұмыстарының өткізілуі, электр тоғымен, не басқа да жарақаттар алғанда алғашқы медициналық көмек көрсету, «Баршаңыздың назарына!» дабылы бойынша облыс мекемелеріне сейсможаттығу өткізу.
Бұған дейін хабарлағанымыздай, Жамбыл облысы 8 балдық сейсмикалық аймақта орналасқан. Облыстың жалпы аумағының 22% сейсмоқауіпті аумақ болып саналады. Оның 70 %-на халық қоныстанса, 85 % өндірістік потенциал мен негізгі көліктік магистральдар орналасқан.