19 жастағы қарағандылық жігіт 250 мың теңгеге танысын өлтіруге тапсырыс берген
ҚАРАҒАНДЫ. ҚазАқпарат - Қарағандыда полицейлер тапсырыспен адам өлтіру қылмысының алдын алды, деп хабарлады облыстық ІІД баспасөз-қызметінен.
Ведомство баспасөз қызметінің ақпаратынша, 19 сәуірде адам өлтіруге тапсырыс берген жігіт Қарағанды сауда үйлерінің бірінің маңында ұсталды.
«9 наурызда Қарағанды облысының ІІД-не 19 жастағы жігіт 18 жастағы танысын өлтіру үшін киллер іздеп жүргені жайлы хабар түсті. Жедел-іздестіру шаралары кезінде тапсырыс беруші 250 мың теңге көлемінде сыйақы тағайындағаны жайлы әңгіме тіркелді. Жігіт ақшаны беріп, орындаушы дәлел ретінде мәйіттің суретін көрсетеді деген талап қойды», - деді ІІД баспасөз қызметінен.
Ұсталған азамат уақытша ұстау оқшаулағышына қамалды. Оған қатысты ҚР ҚК 99-бабы 2-бөлімі бойынша сотқа дейінгі тергеу амалдары жүргізіліп жатыр.
