20 мың жігіт әскерден қашып жүр

АСТАНА. KAZINFORM – 2024 жылы әскерге 40 202 азамат шақырылған. Ал биыл 42 098 адам мерзімді әскери қызметін өтеуге міндеттелді. Десе де, жігіттердің тең жартысы Отан алдындағы борышын орындаудан қашып жүр.

- 2024 жылы мерзімді әскери қызметке 40 202 адам шақырылды. 2025 жылы мерзімді әскери қызметке 42 098 адамды шақыру жоспарлануда. Конституцияның 36 бабы және Президенттің Жарлығы талаптарына қарамастан, шамасы 20 мың астам азамат өзінің азаматтық міндеттерін орындамай, әскери қызметке өз еркімен келмей жүр, - дейді ҚР Қорғаныс министрлігі Kazinform тілшісінің ресми сауалына берген жауабында.

Жауаптылар ешқандай негізсіз әскери қызметтен жалтарғандар 1 жыл бас бостандығынан айырылатынын ескертті.

- Қазақстан Республикасы Әкімшілік құқық бұзушылық туралы кодексінің 647-бабына сәйкес, әскери есепте тұрған немесе тұруға мiндеттi азамат жергiлiктi әскери басқару органының шақыруы бойынша көрсетілген мерзiмде дәлелді себепсіз келмесе, 5 АЕК мөлшерiнде айыппұл салынады. Осы кодекстің 648-бабына сәйкес, азаматтарды әскери есепке қою жөнiндегi комиссияның немесе әскерге шақыру комиссиясының жолдамасы бойынша медициналық куәландырудан не тексерілуден жалтару үшін – 5 АЕК мөлшерiнде айыппұлмен жазаланады. Сонымен бірге, Қылмыстық кодекстің 387-бабына сәйкес, әскери қызметтен босатуға заңды негiздер болмаған кезде осы қызметке шақырылудан жалтару 1000 АЕК дейiнгi мөлшерде айыппұл салуға, не 1 жылға дейiнгi мерзiмге бас бостандығын шектеуге не сол мерзiмге бас бостандығынан айырумен жазаланады, - дейді олар.

Ал әскерге күштеп әкету заңды ма? Білгіңіз келсе, сілтемеге өтіңіз.