20 жылға жуық еңбек өтілі бар мал дәрігері «Шапағат» медалімен марапатталды
ПЕТРОПАВЛ. KAZINFORM — Халықаралық әйелдер күніне орай Президент қолынан марапат алғандардың бірі — Гүлмәрия Уайысова.
Гүлмәрия Қажығалиқызы Солтүстік Қазақстан облысы Шал ақын ауданы Жаңажол ауылдық округінде ветеринарлық дәрігер болып еңбек етеді. 54 жастағы әйел тоқсаныншы жылдардың басында ауылшаруашылығы техникумын бітірген. Мал дәрігері болып еңбек етіп жүргеніне жиырма жылға жуықтаған.
— Президенттің қолынан «Шапағат» медалін алдыңыз, құтты болсын! Мереке қарсаңында бұл кездесу күтпеген оқиға болған шығар?
— Ия, әрине, қоңырау шалғанда мен жұмыста жүргенмін. «Сізді марапаттайтын болдық» деп айтты. Басында түсінбедім, ойладым, Петропавлға бару керек шығар, облыстық әкімдік құттықтайын деп жатыр екен ғой деп. Екі күннен кейін ауданнан хабарласып, Сізді Астанада құттықтайды, Президент Қасым-Жомарт Кемелұлы өзі марапатты табыстайды, дайындала беріңіз дегенде не деп жауап берерімді білмей қалдым. Күтпеген жағдай болды. Бұл менің өмірімдегі естен кетпес оқиға болды.
— Мал дәрігері болу үшін, меніңше, жан-жануарларды жақсы көріп, мейірімді болу керек. Бұл салаға қалай келіп жүрсіз?
— Ауылдың қызымын, балалық шағым төрт түліктің арасында өтті. Өйткені әкем көп жыл бойы зоотехник, ал анам сауыншы болып еңбек етті. Кішкентайымнан ата-анамның қасында жүріп, олардың жұмысын көріп өстім, көп нәрсені әкемнен үйрендім. Ал мектеп бітірген кезде менде басқа мамандық таңдаймын деген ойымда болған жоқ.
— Мал дәрігерінің жұмысы оңай емес екені белгілі, ауырған малды емдеуден басқа да міндеттеріңіз бар ғой?
— Негізгі міндетім, әрине, мал емдеу, мал ауруларының тарауына жол бермеу. Қай ғалымның айтқаны екені есімде жоқ, «жай дәрігер адамды емдейді, ал ветеринар дәрігер адамзатты емдейді» деген. Мен жалғыз емеспін, көмекшім бар. Екеуіміз Жаңажол, Жаңаталап және Кеңес ауылдарына қызмет көрсетеміз. Ауыл шаруашылығы малдарын идентификациядан өткіземіз. Сондай-ақ жануарлардың аса қауіпті ауруларына қарсы міндетті ветеринариялық-профилактикалық жұмыс жүргізіледі. Әдетте мал төлдейтін көктемде жұмысымыз қызады. Сібір жарасына, қарасанға, нодулярлы дерматитке және басқа да ауруларға қарсы вакцина егіледі. Оны екпес бұрын малды бруцеллез, туберкулезге тексеру үшін қан аламыз. Құстар да иммундаудан өтеді. Ветеринариялық іс-шараларды уақтылы және сапалы орындаудың маңызы зор, мал шаруашылығы өнімі мен азық-түлік қауіпсіздігінің кепілі. Жас мамандар келеді, оларға білгенімді айтып, тәжірибеммен бөлісемін. Қоғамдық жұмыстардан да қалмауға тырысамын.
— Отбасыңыз туралы айтып беріңізші. Балаларыңыздың арасында жолыңызды қуғандары бар ма?
— Жолдасым, өкінішке орай, 11 жыл бұрын жүрек ауруынан — инсульттен кенеттен қайтыс болды. Үш баламен жалғыз қалдым. Балаларым бүгінде ер жетті. Қазір тұңғыш ұлым мұғалім болып жұмыс істейді. Қызым тұрмысқа шыққан, декреттік демалыста отыр. Кенже қызым университетте оқып, жоғары білім алып, ол да мұғалім болады. Бақытты ана ғана емес, әжемін де.
— Бұған дейін марапаттарыңыз бар ма?
— Алғыс хаттармен, Құрмет грамотасымен марапатталдым. ІІІ дәрежелі «Еңбек даңқы» орденім бар. Еңбегімді елеп-ескеріп жатады. Жұмысым қиын, әрі жауапкершілігі мол, бірақ соған қарамастан мал дәрігері мамандығын таңдағаныма өкінбеймін. Өйткені, ауылыма, еліме пайдам тиіп жатыр. Бүгінгі мүмкіндікті пайдаланып қыз-келіншектерді, әйелдерді мерекемен құттықтағым келеді. Қандай жағдайда болмасын мейірімді, сүйкімді және қайырымды қалыптарыңыздан танбаңыздар.
Бүгін Президент жарлығымен мемлекеттік және қоғамдық қызметке cіңірген еңбегі, елдің әлеуметтік-экономикалық және мәдени дамуына қосқан елеулі үлесі, сондай-ақ әскери және қызметтік борышын үлгілі атқарғаны үшін бірқатар сала маманы мемлекеттік наградалармен марапатталады.
