200 локомотив сатып алынады – Көлік министрлігі

АСТАНА. KAZINFORM – Биыл 2 350 жүк вагон сатып алынып, қажеттілік толығымен жабылады. Бұл туралы Көлік министрлігінің Теміржол және су көлігі комитеті төрағасының орынбасары Нұржан Келбұғанов айтты.

- 2029 жылға дейін теміржолдардың 11 мың шақырымында (70%) күрделі жөндеу жүргізу жоспарланған. Жөндеу жұмыстарының жоспары бойынша 2023-24 жылдары 2 800 шақырымы осы жұмыспен қамтылған. Елімізде 1 800-ге жуық локомотив қолданыста. Былтыр 185 локомотив сатып алынса, биыл 200 локомотив алынады, - деді ол Орталық коммуникациялар қызметіндегі брифингте.

Оның дерегінше, Қазақстанда 300-ге жуық вагон операторлары жұмыс істеп жатыр және 140 мың жүк вагондары тіркелген. Былтыр қосымша 2 350 жүк вагондары сатып алынса, биыл да сол мөлшерде вагон сатып алу жоспарланып отыр. Осыдан кейін елімізде жүк вагондары толығымен жеткілікті болады.

- Көршілес елдермен теміржол түйіспелерінде пойыздарды өткізу қабілетін арттыруға нақты шаралар жүргізіліп жатыр. Мысалы, Ресей елімен 9 теміржол түйіспесінің 5-еуінде, яғни, Семиглавый Мар, Орск, Илецк, Қарталы, Құрқамыс түйіспелерінде екі жақты жұмыс басталды. Осылайша аталған өткелдердің өткізу қуаты 20 пайызға артады. Ал Өзбекстанмен шекарадағы Сарыағаш түйіспесінде жаңа жолдар салынады. Ол түйіспенің қуаттылығын 12 пайызға ұлғайтады, - деді Нұржан Келбұғанов.

Айта кетейік, Көлік министрлігі темір жол саласында қолға алынатын жобаларды атады.