2010-2014 жылдарға арналған агроөнеркәсіптік кешенді дамыту бағдарламасында өндірістік көрсеткіштер серпіні жіті айқындалған - А.Күрішбаев

ЛМАТЫ. Мамырдың 29-ы. ҚазАқпарат /Данияр Сиқымбаев/ - Азық-түлік қауіпсіздігін қамтамасыз етудегі нақты құрал елдің ірі қалаларының, атап айтқанда Алматының және Астананың төңірегінде орнықты жұмыс істейтін өндірістік белдеу құру болмақ. Бұл туралы бүгін Алматыда арнайы кеңесте ҚР Ауыл шаруашылығы министрі Ақылбек Күрішбаев айтты.

«Ел Президентінің Қазақстан халқына Жолдауында агроөнеркәсіптік кешенді дамытудың ірі ауқымды міндеттері белгіленген. Бұл міндеттер Ауыл шаруашылығы министрлігі жасаған 2010-2014 жылдарға арналған Агроөнеркәсіптік кешенді дамыту бағдарламасының негізіне алынды. Оны жасаудағы инновациялық тұрғы біріншіден, ішкі, сондай-ақ сыртқы нарықтар қажетсінетін өнімдер өндірісі, екіншіден, заманауи технологияларды өндіріске енгізу үдерісінде ынталандыру үшін қолдаудың ықтимал шараларын барынша пайдалану болуы тиіс. Үшіншіден - бұл жүзеге асырылатын шараларды айқын нақтылай түсу үшін агроөнеркәсіптік кешенді дамытудың неғұрлым басымдықты, перспективалық сегіз шеберлік-жоспарларын жасау» - деді министр.

А.Күрішбаевтың айтуынша, бұрынғы қабылданған бағдарламалардан өзгешелігі - бұл құжатта мақсатты өндірістік көрсеткіштердің серпіні бойынша жалпы міндеттер әр ауданға, әр ауылдық округ және тіпті әрбір кәсіпорынға дейін бөлініп жіті айқындалған.