2011-2015 жылдары еліміздің ауыл шаруашылығы саласының жалпы өнімі көлемінің өсу деңгейі 4,3 пайызды құрайды

АСТАНА. Тамыздың 31-і. ҚазАқпарат /Марлан Жиембай/ - 2011-2015 жылдары еліміздің ауыл шаруашылығы саласының жалпы өнімі көлемінің өсу деңгейі 4,3 пайызды құрайды. Бұл туралы бүгін Үкімет отырысы барысында 2011-2015 жылдарға арналған Қазақстанның әлеуметтік-экономикалық даму болжамының жобасын таныстырған Экономикалық даму және сауда министрі Жанар Айтжанова айтты.

«Ауыл шаруашылығы саласының жалпы өнімі көлемінің өсу деңгейі 2011-2015 жылдары орташа деңгейде 4,3 пайызды құрап, 2015 жылға қарай 4,8 пайызға жетеді», деді министр.

Оның атап өтуінше, аталған көрсеткіштерге жетуге өсімдік саласында шығарылатын өнімдердің жеке көлемінің өсуімен қатар, олардың әлемдік бағаларының жоғарылауы ықпал етпек. Мәселен, халықаралық ұйымдардың болжамы бойынша орта мерзімді кезеңдегі арпаның әлемдік бағасы 3,4, күріштің әлемдік бағасы 1 пайызға өседі.

Ж.Айтжанованың пайымынша, өнеркәсіп пен ауыл шаруашылығы саласының дамуы көлік және сауда салаларының өсуін қамтамасыз ететін болады.

«Көлік қызметі саласының өсуі 2011 жылы 3, 2012 жылы - 2,2, ал болжамды мерзімде орташа 3,7 пайыз деңгейінде, сауда жұмыстарының көлемі 2011 жылы 4, 2012 жылы - 4,1, ал болжамды мерзімде орташа 5,4 пайыз деңгейінде болжамданып отыр», деді Экономикалық даму және сауда министрі.