2011 жылы ЖІӨ өсімі 5 пайыз деңгейінде болжанады - Ж. Айтжанова

АСТАНА. 4 ақпан. ҚазАқпарат /Қанат Мәметқазыұлы/ - 2011 жылы Қазақстанның жалпы ішкі өнімі 5 пайыз деңгейінде болжанады. Бұл туралы бүгін Экономикалық даму және сауда министрлігінде өткен алқа мәжілісінде ведомство басшысы Жанар Айтжанова мәлім етті.

Ж. Айтжанованың айтуынша, министрліктің ағымдағы жылғы басты міндеттері Мемлекет басшысының жүктеген міндеттерін, оның ішінде ағымдағы жылғы Жолдауда қамтылған тапсырмаларын жүзеге асыру, сондай-ақ Үкімет басшысы тарапынан алға қойылған міндеттерді орындау болып табылады. «Бұл ретте макроэкономикалық сараптама және болжауларға келетін болсақ, 2011 жылы еліміздің жалпы ішкі өнімінің нақты өсім деңгейі 5 пайызға болжанады. Көрсеткішке қол жеткізу үшін әлемдік экономикалық дамудың көмескілігі аясында әлі де сақталып тұрған тәуекелдерді ескере отырып, макроэкономикалық тәуекелдермен жұмыс жандана түседі», - деді министр.

Оның айтуынша, 2012-2016 жылдарға арналған елдің әлеуметтік-экономикалық даму болжамын қалыптастыру алдағы үшжылдық бюджетті құруға негіз болады.