2014 жылы жұмыс істейтін декреттік демалыстағы әйелдер үшін 4 млрд. теңгеден астам зейнетақы жарналары төленді - ҚР ДСӘДМ

АСТАНА. ҚазАқпарат - Мемлекет 2014 жылы жұмыс істейтін декреттік демалыстағы әйелдер үшін 4 млрд. теңгеден астам зейнетақы жарналарын төледі, деп хабарлайды ҚР Денсаулық сақтау және әлеуметтік даму министрлігінің баспасөз қызметінен.

Бала күтіміне байланысты декреттік демалыстағы жұмыс істейтін әйелдер үшін 2014 жылы республикалық бюджеттен міндетті зейнетақы жарналарын субсидиялау түрінде 4 млрд. теңгеден астам қаржы төленді.

Еске сала кетейік, 2014 жылғы 1 қаңтардан бастап бала 1 жасқа толғанға дейін оның күтімі бойынша декреттік демалыстағы жұмыс істейтін әйелдерге зейнетақы жинақтарын міндетті субсидиялау енгізілді.

2014 жылғы 1 желтоқсандағы жағдай бойынша 101 024 алушының жеке зейнетақы шотына 4,06 млрд. теңге аударылды. Субсидияның орташа мөлшері 4021 теңгені құрады.