2020 жылға қарай елордаға келетін шетелдік туристер саны миллионға жетеді
«Негізгі мақсат - 2020 жылға қарай көрсеткішті 2 млн туристке, оның ішінде 1 миллионын шетелдік туристке жеткізу. Өткен жылы келген туристердің жалпы саны 830 мыңды құраса, оның 270 мыңы шетелдік болды», - деді ол.
Әкімнің айтуынша, қаланың туристік әлеуетін арттыру мақсатында арнайы жол картасы әзірленіп, оның оқиға-іскерлік, рекреациялық-қалалық және медициналық туризм сынды үш бағыты айқындалған.
«ЭКСПО-2017 көрмесін өткізудің арқасында қаланың танымалдығы артқанын және шара аясында іс-шараларды сынақтан өтізуге мүмкіндік болғанын атап өткен орынды. Спорттық, мәдени және экономикалық бағыттардағы 300-ден астам іс-шара өткізілді», - деді Исекешев.
Оның дерегінше, қазіргі уақытта қаланың туристік инфрақұрылымы жақсы. Елордада 15 мың адам сиятын 201 қонақ үй, 1100 дәмхана мен мейрамхана, сондай-ақ қонақ күтуге қатысы бар өзге де ныснадар жұмыс істеп тұр.
«Жол картасы аясында бірқатар байыпты іс-шара өткізу жоспарланған. ҚР Мәдениет және спорт министрлігімен бірге мәдени, спорттық, халықаралық сипаттағы 470-тен астам, сонымен бірге министрліктермен және ведомстволармен халықаралық форумдар мен конференциялар өткізуді айқындаудамыз. Аталған шаралардың негізгі басымдығы - шетелдік және біздің өңірлерімізден туристердің қатысуы», - деді елорда басшысы.
Исекешевтің сөзіне қарағанда, мұнан бөлек қалада туристерге тартымды болатын ғарыш музейі, ботаникалық бақ, жабық аквапарк, отбасылық ойын-сауық орталықтары және спорттық нысандар салу жоспарлануда.