2024 жылы ірі кәсіпорындардың зиянды шығарындылары 6% азайды – Экология министрлігі

АСТАНА. Kazinform – Елімізде ірі өнеркәсіптік кәсіпорындардың шығарындыларына мониторинг жасаудың автоматтандырылған жүйесін орнату жұмысы аяқталуға жақын. Бұл туралы ҚР Экология және табиғи ресурстар вице-министрі Жомарт Әлиев айтты.

— 2024 жылдың қорытындысы бойынша нормативтік шығарындылар көлемі шамамен 1%-ға төмендеді. Бұл көрсеткіштің мардымсыз болуы елдегі жалпы экономиканың өсуімен және инвестиция тарту аясында жүзеге асырылып жатқан жобалармен байланысты. Сонымен қатар, елдегі ең ірі 50 өнеркәсіптік кәсіпорынның (ТОП-50) қатарына кіретін және зиянды заттардың негізгі үлесін (63%) құрайтын 1-санаттағы нысандар бойынша шығарындылар шамамен 6%-ға азайды, — деді ол ОКҚ алаңында.

Вице-министрдің айтуынша, өңірлік экологиялық проблемаларды кешенді шешу үшін бекітілген 19 жол картасы аясында 600 іс-шара қарастырылған. Олардың 454-і немесе 76%-ы орындалған, ал қалған 146-сын іске асыру мерзімі белгіленген.

— Ірі өнеркәсіптік кәсіпорындардың шығарындыларын бақылау мақсатында автоматтандырылған мониторинг жүйелерін (АМЖ) орнату жұмыстары аяқталуға жақын. Қазіргі таңда АМЖ орнатуға міндетті 91 кәсіпорынның 72-сі (79%) жүйені орнатып, деректерді «Қоршаған ортаның және табиғи ресурстардың жай-күйі туралы ұлттық деректер банкі» ақпараттық жүйесіне жіберуде, — деді Жомарт Әлиев. 

Айта кетейік, бұған дейін 10 өңір өнеркәсіптік шығарындыларды автоматты бақылау жүйесін орнатуға қаржы таппай отырғанын жазған едік.