2025 жылы әлемдегі ең бай 25 ел анықталды

АСТАНА. KAZINFORM — Visual Capitalist порталы әзірлеген инфографикада 2025 жылы ең жоғары әл-ауқат деңгейіне ие елдердің үш рейтингі ұсынылған, деп хабарлайды АЗЕРТАДЖ.

Сол жақ бағанда елдер жан басына шаққандағы жалпы ішкі өнім (2025 жылға арналған Халықаралық валюта қорының деректері), ортасында — жан басына шаққандағы жалпы ұлттық табыс (2024 жылға арналған Дүниежүзілік банктің деректері), ал оң жақ бағанда — медиандық әл-ауқат деңгейі бойынша (2024 жылға арналған Швейцарияның UBS банкі деректері) сұрыпталған.

Фото: Азертадж

 

Әр түрлі критерийлерді қолдану мемлекеттердің ең бай елдер рейтингіндегі позицияларына айтарлықтай әсер ететіні анық. Барлық үш тізімге де алғашқы бестікке енген жалғыз мемлекет — Люксембург болды. Ол жан басына шаққандағы жалпы ішкі өнім бойынша бірінші орында ($140,9 мың) және медиандық әл-ауқат бойынша бірінші орында ($395,3 мың) тұр, ал жан басына шаққандағы жалпы ұлттық табыс бойынша төртінші орында ($91,5 мың). Бұл ретте ол Бермуд аралдарына ($140,3 мың), Норвегияға ($98,2 мың) және Швейцарияға ($95,9 мың) жол береді.

2025 жылы жан басына шаққандағы жалпы ішкі өнім бойынша ең бай он елдің рейтингі келесідей:

• Люксембург — $140,9 мың;

• Ирландия — $108,9 мың;

• Швейцария — $104,9 мың;

• Сингапур — $92,9 мың;

• Исландия — $90,3 мың;

• Норвегия — $89,7 мың;

• АҚШ — $89,1 мың;

• Макао — $76,3 мың;

• Дания — $75 мың;

• Қатар — $71,7 мың.

Осыдан бұрын жұмыс пен өмір cүру көрсеткіші ең жақсы елдердің рейтингі жарияланды.