2026 жылғы Олимпиада ойындарын ұйымдастыру комитеті мәлімдеме жасады
АСТАНА.KAZINFORM - Халықаралық Олимпиадалық комитеті (ХОК) мен 2026 жылғы қысқы Олимпиада және Паралимпиада ойындарын ұйымдастыру комитетінің бірлескен семинары өтті.
Қазақстан Ұлттық Олимпиадалық комитеті атынан іс-шараға Спорт департаментінің басшысы Бектұр Қиятбай мен Халықаралық қатынастар департаментінің директоры Анар Сыздықова қатысты.
Семинар барысында 78 ҰОК пен 33 Ұлттық Паралимпиадалық комитетінің өкілдері Олимпиада ойындарына дайындық туралы толық ақпарат алды. Атап айтқанда, Олимпиада қалашығы мен қонақүйлердің жағдайы, спорттық нысандардың дайындығы, логистика, әлеуметтік желілерді жүргізу ережелері және қауіпсіздік шаралары талқыланды.
2026 жылғы қысқы Олимпиада ойындары 6-22 ақпан аралығында өтеді деп жоспарланып отыр. Оған кемінде 3500 спортшы қатысып, 195 медаль жиынтығы сарапқа салынады. Бұл Олимпиада бағдарламасына алғаш рет ски-альпинизм спорты енгізілді.
2026 жылғы Олимпиада Италия тарихындағы төртінші болмақ. Бұған дейін 1956 жылы Кортина-д’Ампеццода, 2006 жылы Туринде қысқы, ал 1960 жылы Римде жазғы Олимпиада ойындарын өткізген.
Милан жарыстардың басты орталығы болады. Мұнда конькимен жүгіру, шорт-трек, мәнерлеп сырғанау және шайбалы хоккей бойынша жүлделер сарапқа салынады.
– Ресми ақпаратқа сәйкес, Миланда Олимпиада қалашығының құрылысы аяқталуға жақын. Ойындардан кейін ол студенттерге арналған тұрғын үй кешені ретінде пайдалануға берілмек. Сонымен қатар дәстүрлі спортшылар қалашығы Кортинода және Предаццода орналасады. Қалған жарыс аймақтарында спортшылар әлемдік чемпионаттар мен кубоктарды қабылдау тәжірибесі бар қонақүйлерде тұрады. Делегациялар үшін барлық қажетті жағдай жасалады. Ұйымдастыру комитетінің мәліметінше, дайындық кестеге сай жүргізіліп жатыр және айтарлықтай кешігу жоқ, – деп мәлімдеді Бектұр Қиятбай.
Олимпиада ойындарының жарыс аймақтары:
Кортина кластері:
Антерсельва – биатлон
Кортина – тау шаңғысы (әйелдер), шана спорты, бобслей, скелетон, кёрлинг
Вальтеллина кластері:
Бормио – тау шаңғысы (ерлер), ски-альпинизм
Ливиньо – сноуборд, фристайл (акробатика, могул, биг-эйр, халф-пайп, ски-кросс)
Валь-ди-Фьемме кластері:
Предаццо – шаңғы жарысы, шаңғымен трамплиннен секіру, қоссайыс
Олимпиада тарихында алғаш рет ашылу салтанаты төрт жарыс аймағында бір мезетте өткізіледі. Олимпиада алауы Милан мен Кортинода бір уақытта жағылып, басты сахна ретінде Миландағы әйгілі «Сан-Сиро» стадионы таңдалып отыр.
Олимпиаданың жабылу рәсімі Веронада өтеді.
Бұған дейін бокс 2028 жылғы Олимпиада ойындарының бағдарламасына енгізілгенін жазған болатынбыз.
