30 наурыз. Тұлғалар туған күн
Бүгін, 30 наурыз күні тұлғалардан кімдер дүниеге келген? Kazinform оқырмандарына есімдер күнтізбесін ұсынады.
ЕСІМДЕР
65 жыл бұрын (1960) «Астана Бас жоспары» ғылыми-зерттеу жобалау институтының директоры Сәрсембек Ендібайұлы ЖҮНІСОВ дүниеге келді.
Талдықорған облысында туған. 1982 жылы Алматы сәулет және құрылыс институтын бітірген.
Еңбек жолы: 1982 жылдан бастап «Алматы гипрогор» мемлекеттік конструкторлық институтының сәулетшісі, аға сәулетшісі, жетекші архитекторы, басшысы болды. 1988-1994 жылдары «Алматы бас жоспары» мемлекеттік жобалау институтының топ жетекшісі, жобалардың бас сәулетшісі, Алматы қаласы бас жоспарының мамандандырылған цехының басшысы, 1994-1996 жылдары Алматы қаласының сәулет және қала құрылысы басқармасының бастығы, 1996-1997 жылдары Ақмола қаласының бас жоспарын жасау бойынша «Ақорда» жобалау-құрылыс компаниясының цех басшысы, 1997-2000 жылдары «Астана қаласының сәулет және қала құрылысы департаменті» мемлекеттік мекемесінің бас сәулетші орынбасарының міндетін атқарушы, 2000-2006 жылдары «Астана Бас жоспары» Мемлекеттік кәсіпорны директорының орынбасары — бас сәулетшісі, 2006-2007 жылдары «Бас жоспар.KZ» ЖШС директоры, 2007 жылдан бастап «Астанабасжоспар» Мемлекеттік кәсіпорнының бас сәулетшісі — бас директордың орынбасары; Астана қаласының Сәулет және қала құрылысы басқармасының бастығы, Қазақстан Республикасы Президентінің жанындағы Астана сәулет кеңесінің хатшысы.
Қазіргі лауазымын 2015 жылғы наурыз айынан бері атқарып келеді.
«Құрмет» орденімен, «Ерен еңбегі үшін», «Астанаға 10 жыл», «Қазақстан Конституциясына 10 жыл», «Қазақстан Республикасының Тәуелсіздігіне 10 жыл» медальдарымен марапатталған.
49 жыл бұрын (1976) Қарағанды қаласы әкімінің орынбасары Қайрат Амангелдіұлы КАМЗИН дүниеге келді.
Қарағанды қаласында туған. 1998 жылы Қарағанды мемлекеттік техникалық университетін, 2009 жылы Қарағанды «Болашақ» университетін тәмамдаған.
1993-1998 жылдары Қарағанды мемлекеттік техникалық университетінің студенті, 1999-2000 жылдары Қарағанды қаласы «Азия Центр и К» ЖШС автослесарі, 2001-2002 жылдары Қарағанды қаласы «Водоканал» ААҚ бас маманы, 2002-2003 жылдары Қарағанды қаласы «КУГХ» ЖШС «Алаутрансгаз» АҚ жетекші маманы, 2003-2005 жылдары Қарағанды қаласы «SAT Plus» ЖШС директорының орынбасары, 2005 жылы Техникалық реттеу және метрология Комитетінің Қарағанды облысы бойынша басқармасының жетекші маманының міндетін атқарушы, 2005-2006 жылдары Техникалық реттеу және метрология Комитетінің Қарағанды облысы бойынша басқармасының жетекші маманы, 2006-2007 жылдары Қарағанды қаласының Қазыбек би атындағы ауданы әкмі аппаратының ұйымдастыру және кадр жұмысы бөлімінің бас маманы, 2007-2008 жылдары ҚР табиғи монополияларды реттеу Агенттігінің Қарағанды облысы бойынша басқармасының мемлекеттік монополиялар және талдау бөлімінің бас маманы, 2008-2009 жылдары ҚР табиғи монополияларды реттеу Агенттігінің Қарағанды облысы бойынша департаментінің техникалық реттеу бөлімінің бас маманы, 2009-2010 жылдары ҚР табиғи монополияларды реттеу Агенттігінің Қарағанды облысы бойынша департаментінің техникалық реттеу бөлімінің бастығы, 2010-2012 жылдары Қарағанды облысының энергетики және тұрғын үй-коммуналдық шаруашылық басқармасы бастығының орынбасары, 2012-2021 жылдары Приозерск қаласының әкімі, 2021-2022 жылдары Қарағанды облысының мемлекеттік сәулет-құрылысын бақылау басқармасының басшысы, 2022 жылы «Қарағанды облысы құрылыс, сәулет және қала құрылысы басқармасы» мемлекеттік мекемесінің басшысы болды.
2023 жылдың мамыр айынан бастап қазіргі қызметінде.
49 жыл бұрын (1976) Ақмола облысы бойынша Мемлекеттік кірістер департаменті басшысының орынбасары Батырхан Мақсатұлы КӘРІМОВ дүниеге келді.
Солтүстік Қазақстан облысы, Ақжар ауданы, Алқатерек ауылында туған.
2005 жылы А.Мырзахметов атындағы Көкшетау университетін «Есеп және аудит» мамандығы бойынша бітірген.
Еңбек жолын 1999 жылы Солтүстік Қазақстан облысы бойынша салық комитетінің аға инспекторы болып бастады. 2002-2007 жылдары Солтүстік Қазақстан облысы бойынша салық комитетінің ұйымдастыру бөлімінің аудит бөлімінің, ішкі аудит бөлімінің жеке тұлғалардың аудитін ұйымдастыру бөлімінің бас салық инспекторы, 2007-2009 жылдары ҚР Қаржы министрлігі Салық кодексінің Халықаралық салық салу департаментінің сарапшысы, 2009-2011 жылдары «Бәйтерек» Қазақстан-Ресей бірлескен кәсіпорны» АҚ ішкі аудит қызметінің басшысы, Көкшетау қаласы бойынша салық басқармасы, Ақмола облысы бойынша салық департаменті бастығының орынбасары, 2012-2014 жылдары Ақмола облысы бойынша Салық департаменті басшысының орынбасары, 2014-2022 жылдары Көкшетау қаласы бойынша Мемлекеттік кірістер басқармасының басшысы қызметтерін атқарды.
2022 жылдың қазан айынан бері қазіргі қызметінде.
147 жыл бұрын (1878-1941) ғалым, Қазақстан фаунасын тұңғыш зерттеуші, биология ғылымының докторы Даниил Николаевич КАШКАРОВ дүниеге келген.
Ресейде туған. Мәскеу мемлекеттік университетінің жаратылыстану бөлімін және медицина факультетін бітірген. 1919-1941 жылдары Орта Азия университетінің, Ленинград мемлекеттік университетінің омыртқалылар зоологиясы кафедрасын басқарған. Ол Орта Азия мен Қазақстанның құрлық омыртқалылары фаунасы мен экологиясын зерттеген. Республикада Ақсу-Жабағылы қорығын ұйымдастыру қажеттігін негіздеп берген. Ғалымның зоология және жануарлар экологиясы жайындағы оқулықтары мен монографиялары жарық көрген.
85 жыл бұрын (1940-2015) заң ғылымдарының докторы, профессор, Қазақстан Республикасының құрметті судьясы Мақсұт Сұлтанұлы НӘРІКБАЕВ дүниеге келген.
Алматы облысында туған. С. М. Киров атындағы Қазақ мемлекеттік университетін (әл-Фараби атындағы Қазақ ұлттық университеті) бітірген.
Еңбек жолы: Әділет министрлігінде және республика прокуратурасында жұмыс істеген. 1992-1993 жылдары Президент аппаратында және Қазақстан Республикасының Министрлер кабинетінде қызмет етті. 1995-1996 жылдары Қазақстан Республикасының Бас прокуроры. 1996-2000 жылдары Қазақстан Республикасы Жоғарғы сотының төрағасы. 2000 жылдан «Қазақ гуманитарлық заң университеті» АҚ президенті. 2004 жылдан Жалпы қоғамдық «Қазақстанның демократиялық партиясының» төрағасы. 2-ші дәрежелі Мемлекеттік заң кеңесшісі, жоғары дәрежедегі судья. Жеткіншек және заң, балалықты заңмен қорғау, азаматтық құқықты сотта қорғау, Қазақстан Республикасының қылмыстық заңы тақырыптарына жазылған кітаптардың және 50-ден астам ғылыми мақаланың авторы.
74 жыл бұрын (1951-2023) мемлекет қайраткері Сергей Александрович ТЕРЕЩЕНКО дүниеге келген.
Ресей Федерациясының Приморск өңірінде туған. Қазақ ауыл шаруашылығы институтын, Алматы жоғары партия мектебін бітірген. 1989-1990 жылдары Қазақ КСР Министрлер Кеңесі төрағасының орынбасары, Қазақ КСР Жоғарғы Кеңесі төрағасының бірінші орынбасары, Қазақ КСР Президентінің орынбасары, Қазақ КСР Президенті Кеңсесінің жетекшісі, Қазақ КСР Президенттік кеңесінің мүшесі. 1990-1991 жылдары Шымкент облыстық партия комитетінің бірінші хатшысы, Шымкент облыстық кеңесінің төрағасы. 1991-1994 жылдары Қазақстан Республикасының Премьер-Министрі. 1992-1993 жылдары — сонымен қатар Қазақстан Республикасының Шетел инвестициясы жөніндегі ұлттық агенттіктің төрағасы. 1993-1994 жылдары Ұлттық валюта енгізу жөніндегі ұлттық комисияның төрағасы қызметтерін атқарған. 1994 жылдан Халықаралық «Интеграция» қоры басқармасының төрағасы. 1998-2008 жылдары «ЦентрКредит банкі» АҚ, «Трансаэро» ӘК» ААҚ, «Индустриальный банк Казахстана» ААҚ, «Бәйтерек» БК АҚ, «Vita» АҚ-ның директорлар кеңесінің мүшесі. 2004 жылдан Қазақстан Республикасының Сақтандыру нарығына қатысушылар қауымдастығының президенті. 1999 жылдан «Отан» партиясы саяси кеңесінің мүшесі. 1998-1999 жылдары «Қазақстан Республикасы Президенті Н.Ә. Назарбаевтың кандидатурасын қолдау жөніндегі қоғамдық штаб» Қоғамдық Ұйымының төрағасы. 1999-2002 жылдары «Отан» партиясы төрағасының міндетін атқарушы. 2002-2006 жылдары Қазақстан Халықтары ассамблеясы төрағасының орынбасары қызметтерін атқарған. 2004 жылдан — Қазақстандағы славян, орыс және казактар қауымдастығының төрағасы. 2008 жылдан «Нұр Отан» ХДП жанындағы «Абырой» қоғамдық-кеңес беру кеңесінің төрағасы.
2-ші дәрежелі «Барыс», 1-ші дәрежелі «Достық», «Дружба» (РФ) ордендерімен, медальдармен марапатталған, Президент сыйлығының лауреаты, Оңтүстік Қазақстан облысының құрметті азаматы.
55 жыл бұрын (1970-2015) мемлекет қайраткері Нұрлан Жамбылұлы ҚАППАРОВ дүниеге келген.
Алматы қаласында туған. Қазақ мемлекеттік университетін, Алматы технологиялық институтын және Гарвард университетінің Дж. Кеннеди атындағы Жоғарғы мемлекеттік басқару мектебін бітірген.
Еңбек жолы: 1991-1997 жылдары «Акцепт» Корпорациясы ЖАҚ президенті; 1997-1998 жылдары «ҚазТрансОйл» ЖАҚ президенті; 1998-1999 жылдары «Қазақойл» ЖАҚ президенті; 1999-2001 жылдары ҚР Энергетика және минералдық ресурстар вице-министрі; 2003-2007 жылдары «Қазинвестбанк» АҚ Директорлар кеңесінің төрағасы; 2004-2012 жылдары «Lancaster Group Kazakhstan» АҚ Директорлар кеңесінің төрағасы; 2012-2013 жылдары ҚР Қоршаған ортаны қорғау министрі, 2013-2014 жылдары Қоршаған орта және су ресурстары министрі, 2014 -2015 жылдары «Қазатомөнеркәсіп» акционерлік қоғамының президенті. 2015 жылғы 26 наурызда қайтыс болды.
