31 тамыз. Тұлғалар туған күн
Бүгін, 31 тамыз күні тұлғалардан кімдер дүниеге келген? Kazinform оқырмандарына есімдер күнтізбесін ұсынады.
ЕСІМДЕР
Аманжол Дүйсенбайұлы ӘЛТАЙ, қазақстандық ғалым, филолог, айтыскер ақын.
Ұлытау облысы Жаңаарқа ауданында туған. Қарағанды мемлекеттік университетін «филолог» мамандығы бойынша бітірген (1993). Филология ғылымдарының докторы, профессор.
Еңбек жолы: Е.А. Бөкетов атындағы Қарағанды мемлекеттік университетінің қазақ әдебиеті кафедрасының оқытушысы (1993-2000); Л.Н.Гумелев атындағы Еуразия ұлттық университетінің қазақ және шетел әдебиеті кафедрасының аға оқытушысы (2000-2005); ЕҰУ қазақ және шетел әдебиеті кафедрасының доценті (2005-2014); Л.Н.Гумелев атындағы Еуразия ұлттық университетінің профессоры (2014); VII сайланған Қазақстан Парламенті Мәжілісінің «Аманат» партиясынан депутаты (2022-2023).
2023 жылдың наурыз айынан бері қазіргі қызметінде.
«Құрмет» орденімен марапатталған (2019); Ыбырай Алтынсарин (2015), халықаралық ТҮРКСОЙ ұйымы (2016), Қазақстан Республикасының Тәуелсіздігіне 10 жыл (2001), Қазақстан Республикасының Тәуелсіздігіне 25 жыл (2016), Астананың 20 жылдығы (2018) медальдарымен марапатталған.
Марат Мақсұтұлы АЙМАШЕВ, Қазақстан Республикасы Қауіпсіздік Кеңесі Әскери қауіпсіздік және қорғаныс бөлімінің бастығы.
Славянск-на-Кубань қаласында (Ресей Федерациясы) туған. Алматы жоғары құрама қару-жарақ командалық училищесін «Бронды және автокөлік техникасын пайдалану инженері» мамандығы бойынша бітірген (1995); Ұлттық қорғаныс университеті, «Жедел-тактикалық басқару» магистратурасын бітірген (2008).
Еңбек жолы: Қазақстан Республикасы Қарулы Күштері Бас штабы Стратегиялық жоспарлау департаменті басқарма бастығының орынбасары; Бас штаб бастығының орынбасары – Қазақстан Республикасы Қарулы Күштері Құрлық әскерлерінің Жоғарғы Бас қолбасшысы дирекциясының Бас штабы Жедел басқармасының бастығы; Өңірлік қолбасшылық қолбасшысының бірінші орынбасары – «Астана» өңірлік қолбасшылығы Бас қолбасшы дирекциясының штаб бастығы (2016); Қазақстан Республикасы Қарулы Күштері Бас штабы Стратегиялық жоспарлау басқармасының бастығы (2021-2022); Қазақстан Республикасы Қарулы Күштері Бас штабы Жедел жоспарлау басқармасының бастығы (2022-2024).
2024 жылғы қаңтар айынан бастап қазіргі қызметінде. Генерал-майор (2019).
«Айбын» (2018), II дәрежелі «Даңқ» (2023) ордендерімен марапатталған.
Зәмзәгүл Нүсіпбайқызы ШӘРІПОВА, Қазақстанның халық әртісі.
Алматы облысы Жамбыл ауданының Ұзынағаш ауылында туған. Алматы театр училищесін бітірген. «Қазақфильм» киностудиясы мен Қазақ радиосында жұмыс істеді. 1953 жылы Алматыдағы Қазақ драма театрының труппасына қабылданды. «Менің әкем кім» спектаклінде Лағылдың, Ғабит Мүсіреповтің «Ақан сері-Ақтоқтысында» - Ақтоқтының, Мұхтар Әуезовтің «Айман-Шолпанында» - Қарагөздің және «Қарагөзде» - Қарагөздің, Сәбит Мұқановтың «Шоқан Уәлихановында» - Айжанның, Уильям Шекспирдің «Отелласында» - Дездемонаның және басқаларының рөлдерін сомдады. Фильмдерді қазақ тіліне дубляж жасауға қатысты, радиода көркемсөз оқу шебері болды. «Өжет қыз» фильмінде - Нұржамал, «Біз осында тұрамыз» фильмінде - Дина, «Өмір жолында» - Хадиша, «Абай» телефильмінде - Қарлығаш рөлдерін экранға шығарды. Мәскеудегі қазақ әдебиеті мен өнерінің онкүндігіне қатысты.
«Құрмет белгісі» және «Халықтар достығы» ордендерімен марапатталған.
