Ақтөбедегі 350 студенттің шағымы: ректордың бұйрығы заңсыз болып шықты
АҚТӨБЕ. KAZINFORM – Қазақ-орыс халықаралық университеті ректорының 350 студентті оқудан шығару туралы бұйрығы заңсыз болып шықты. Бұған дейін хабарлама алған студенттер оқуын жалғастыра алады.
Кеше 350 студент өздерінің оқудан шығырылғанын біліп, оның себебін сұрады. Ал бүгін түсте өңірге ҚР Ғылым және жоғары білім министрлігі Жоғарғы және жоғарғы оқу орнынан кейінгі білім комитеті төрағасының орынбасары Ақерке Абылайхан келді. Арада 4 сағат өткенде тексерудің алғашқы қорытындысы шықты.
– Бұл – жекеменшік университет. Бірақ ел заңына бағынады. Біріншіден, оқудан шығару туралы бұйрық 2025 жылдың 18 наурызы күні шыққан. Министрлік бұйрығына сәйкес егер студент оқудан шығарылса, жоғары білім платформасындағы статусы өзгеруі керек. Бұл өзгермеген. Яғни, бәрі де студент. Екіншіден, шығарылған бұйрық тек орыс тілінде болды. Заң талаптары бойынша құжат қазақ тілінде болуы шарт. Университеттің құжаттарында құқықтық сұрақтар көп. Келісімшартта 40 сағат сабақтан қалса деп жазылған, ал университеттің ішкі ережесінде 60 сағат деп жазулы тұр. Қазіргі кезде барлық студенттің құқықтық статусы сақталған. Оқудан шығарылмайды, - деді ҚР Ғылым және жоғары білім министрлігі Жоғарғы және жоғарғы оқу орнынан кейінгі білім комитеті төрағасының орынбасары Ақерке Абылайхан.
Оның айтуынша, студенттердің бәрі биыл сессиясын аяқтай алады. Ал ректордың оқудан шығару туралы бұйрығы заңсыз.
– Студенттің неге сабаққа келмегенін зерделейміз. Студент сабаққа міндетті түрде қатысуы тиіс. Қазіргі кезде 100-ден астам студентің түсініктемесі бар. Түрлі себебі айтылған. Олар сабаққа келеміз, қатысамыз деп отыр. Сессияны аяқтап, басқа университетке де ауыса алады, - деді Ақерке Абылайхан.
Еске салсақ, Қазақ-орыс халықаралық университетінде оқуға келмеген, оқу ақысын төлемеген 350 студент оқудан шығарылды. Дәлірек айтқанда 91-і оқу ақысын төлемеген, қалған 259 студент сабаққа мүлде қатыспаған.
