4 сәуір. Жылнама
Kazinform оқырман назарына 4 сәуірге арналған атаулы күндер мен есте қалар оқиғалар күнтізбесін ұсынады.
АТАУЛЫ КҮНДЕР
Мина қаупі мәселелері бойынша ағарту жұмыстары мен минасыздандырумен байланысты көмектің халықаралық күні
2006 жылдан бастап Біріккен Ұлттар Ұйымының бастамасымен аталып өтеді.
Веб-шебер күні
Веб-шеберлер мейрамын атап өту үшін осы күннің таңдалуы тегін емес. Нақтылап қараса, 4.04 цифрлары 404 санын (интернет-парақшаның табылмауын көрсететін) еске түсіреді. Веб-мастер немесе сайттың «басқарушысы» веб-сайт және интернеттегі корпоративтік қосымшаны жасаумен айналысады.
ЕСТЕ ҚАЛАР ОҚИҒАЛАР
1861 жылы Коряковская станицасы Павлодар деп аталып, қала статусына ие болды.
1930 жылы Біріккен мемлекеттік саяси басқарма (ОГПУ) алқасының үкімімен Ахмет Байтұрсынов бастаған қырыққа жуық адам әртүрлі мерзімдерге қамалуға, жер аударылуға кесілді. Ахмет Байтұрсынов, Міржақып Дулатов, Мырзағали Есболов, Хәлел Ғаббасов, Дінмұхамед Әділов, Жүсіпбек Аймауытов, Ғазымбек Бірімжанов, Әбдірахман Байділдин, Асқар Дулатов, Теміржан Есмағамбетов және тағы басқалары (барлығы 20 адам) ату жазасына кесілді. Ол үкім кейін он жыл мерзімге лагерьде жазасын өтеуге ауыстырылды.
1992 жылы Алматыда ТМД елдерінің мемлекеттік қауіпсіздік және барлау органдарының арасындағы ынтымақтастықтың негізгі принциптері туралы келісімге қол қойды.
1994 жылы «Қазақстан телеарнасы және радиосы» республикалық корпорациясы құрылды.
1994 жылы Корей Халықтық Демократиялық Республикасында «Сәуір көктемі» атты халықаралық фестиваль өтті. Онда «Отырар сазы» ансамблі (жетекшісі - Нұрғиса Тілендиев) бірінші орын алды.
1997 жылы Жамбыл университетіне белгілі тарихшы, әдебиетші, Моғолстан мен оған іргелес облыстардың тарихы жөніндегі аса құнды түпнұсқа болып саналатын «Тарих-и Рашиди», «Джаһаннаме» дастандарының авторы Мұхаммед Хайдар Дулати есімі берілді.
2006 жылы Мәскеудегі Чистопрудный бульварында Қазақстан Президенті Нұрсұлтан Назарбаев пен Ресей Президенті Владимир Путиннің қатысуымен Абай ескерткіші ашылды. Абай ескерткіші Қазақстан халқының Мәскеу қаласына жасаған сыйлығы, жалпы құны 160 млн 800 мың теңгені құрайды. Ескерткіш жобасын қазақстандық мүсінші М.Әйнеков пен дизайнер Т.Сүлейменов басшылық жасаған авторлық топ жасаған.
2006 жылы Қазақстан Республикасының Президенті Нұрсұлтан Назарбаев Мәскеудің құрыш және қорытпалар мемлекеттік институтының профессор-оқытушылар құрамымен кездесті. Кездесуге Мәскеудің жоғары оқу орындарында оқитын қазақстандық студенттер, институттың профессор-оқытушылар құрамы қатысты. Оның барысында институттың ректоры Юрий Карабасов Қазақстан басшысына Мәскеу құрыш және қорытпалар мемлекеттік институтының құрметті профессоры атағы берілгенін хабарлады. Президентке диплом, Құрметті профессор белгісі, мантия және институт ордені тапсырылды. Марапаттау рәсімінен кейін сөз сөйлеген Нұрсұлтан Назарбаев ғалымдар кеңесіне алғысын білдірді, институттың даңқты дәстүрлері туралы айтты және оны бітірушілердің дені Қазақстанда табысты еңбек етіп жатқандарын атап көрсетті.
2006 жылы Мекке қаласында Қос киенің шырақшысы Сауд Арабиясының Королі Абдалла бен Әбділ Әзіздің қамқорлығымен "Ислам үмбетінің бірлігі" атты мұсылман-ғұламаларының бірінші халықаралық конференциясы өтті. Форум жұмысына Қазақстан мұсылмандары діни басқармасының төрағасы, Бас мүфти Әбсаттар қажы Дербісәлі қатысты. Конференцияға әлемнің 150 мемлекетінен келген атақты ислам ғалымдары, дін істері жөніндегі министрлері, ислам орталықтары мен ұйымдарының басшылары қазіргі заманның қауіптері аясындағы мұсылман бірлігін нығайту жолдарын талқылады.
2007 жылы Семей облысының 1939-1997 жылдардағы әкімшілік-аумақтық бөліну тарихы туралы бірегей анықтама жарық көрді. Анықтамада мерзімдік ретте барлық әкімшілік-аумақтық өзгерістер, аудандардан бастап елді мекендерге дейін әкімшілік-аумақтық бірліктердің шекараларын өзгертулері көрсетіліп берілген. Кітапқа енгізілген барлық мәлімет Шығыс Қазақстан облыстық қазіргі заман тарихының құжаттама орталығында сақталған ресми құжаттар негізінде алынған.
2008 жылы Қазақстанның Көлік және коммуникация министрлігінде «Батыс Еуропа - Батыс Қытай» халықаралық транзиттік дәлізін қайта жаңғырту жобасының таныстырылымы өтті. «Батыс Еуропа - Батыс Қытай» халықаралық транзиттік дәлізі осы аймақтағы жүк тасымалының негізгі бағыты саналады. Дәліз заманауи зияткерлік жүйелер мен логистикалық орталық қызметтерін қамтыған жоғары деңгейлі қызметтер көрсетеді. Дәліздің кейбір учаскелерінде жоспарланып отырған ақылы жолдар жүйесі көрсетілетін қызметтің сапасы мен жеделдігін қамтамасыз етпек. Жоба жүк тасымалының үш басты бағытына: Қытай-Орталық Азия, Қытай-Қазақстан, Қытай-Ресей-Батыс Еуропа бағыттарына қызмет көрсететін болады.
2008 жылы Семейде диагностикалық орталықта Виктор Чувилевке арналған мемориалдық тақта ашылды. Бұл адам қалалық және облыстық бірқатар медициналық мекемелердің қалыптасуына өз үлесін қосты. Ол өзінің еңбекқорлығымен және адамдарға деген ықыласымен шүбәйсіз абырой мен тұрғындардың ықыласына бөленді.
2008 жылы Алматыда Қазақстан Республикасының Ұлттық кітапханасына Ресейлік «Нобель дәрістері - 100 жыл» қоры Нобель сыйлығының 1901-2000 жылдар аралығындағы лауреаттарының еңбектерінен тұратын 50 томдық кітаптар топтамасы мен «Нобель дәрістері» атты көрме стендісін сыйға тартты. Әлемде бұдан басқа Нобель сыйлығы иегерлері еңбектерінің толық топтамасы кездеспейді. Топтама өткен 100 жылдықтағы химия, физика, медицина, әдебиет, бейбітшілікті нығайту мен экономика ғылымдарындағы ең жоғарғы жетістіктер мен көрнекті ғылыми-техникалық ашылуларды бейнелейді.
2012 жылы Астанада еңбек дауының алдын алу бойынша Меморандумға қол қойылды.
2013 жылы Өскемендегі қазақстандық көлік құрастыратын «Азия Авто» зауыты жаңа «Skoda Rapid» моделін жинай бастады.
2014 жылы Берлин қаласында мәдени ынтымақтастық жөніндегі Қазақстан-Германия үкіметаралық комиссиясының кезекті төртінші мәжілісі болып өтті.
2014 жылы Оңтүстік Қазақстан облысының Манкент ауылында поляк әскерлері жерленген молада ескерткіш мемориалы ашылды. Оның салтанатты ашылу рәсіміне Польшаның Азап шегушілік және жадыны сақтау кеңесінің бас хатшысы Анджей Кунеров пен Польшаның Қазақстандағы елшісі Яцек Ключковски бастаған Польша делегациясы қатысты.
2018 жылы Қазнетте домендік атауларды тіркеу, пайдалану және тарату ережелері бекітілді. Қазнеттегі домендік атаулардың әкімшісі – Қазақстандық IT-компаниялар қауымдастығы, ал тізілім – Қазақ желілік ақпарат орталығы.
2019 жылы Алматыдағы физика-математика бағытындағы Назарбаев Зияткерлік мектебінің 12-сынып оқушысы Селімжан Чалышқан Гарвардта оқуға грант ұтып алды.
Селімжан Чалышкан – биологиядан Қазақстан олимпиадалық құрамасының мүшесі. Селімжан Тегеранда өткен Халықаралық биология олимпиадасында-2018 қола, республикалық олимпиадада алтын және қола жүлдегер атанды. Зияткерлік мектеп оқушысының ғылымдағы жетістіктерімен қатар инновациялық жобаларды жасауда табысты тәжірибесі бар.
2021 жылы Қарағанды орыс драма театрының әртісі Қ.С. Станиславский Руслан Маевский «Театр фотообъективтегі» (ТЕАТР ЭКСПОСЕД) атты халықаралық театр фотосуреттері байқауының жүлдегері атанды, оған қатысу үшін әлемнің 19 елінен өнерпаздар мен кәсіпқойлар жіберілді.
«Әуесқой» номинациясындағы жұмыстар «Еркін фото» және «Ретро фото» номинациялары бойынша бірінші орынды иеленсе, Р.Маевский «Портрет» номинациясында күміске ие болды.
2022 жылы Непалдың Похара қаласында триатлоннан Азия кубогы мен Оңтүстік Азия чемпионаты өтті. Жарысқа Австрия, Бангладеш, Үндістан, Қазақстан, Польша және Жапониядан 63 спортшы қатысты. Қазақстан Туын Екатерина Шабалина қорғап, басты бәсекелестері – жапондықтардан асып түсті. Жарыс соңында ол 01:02:20 уақытпен мәреге жетіп, бірінші орынды жеңіп алды.
2024 жылы Дулати атындағы Тараз өңірлік университеті, қытайлық компания мен технологиялық дамумен айналысатын отандық компания ұшқышсыз ұшатын аппараттарды (ҰҰА) шығаратын бірлескен кәсіпорын құру және оларды пайдалануға студенттерді оқыту туралы келісімге қол қойды. ҰАО ауыл шаруашылығы, төтенше жағдайлар, медицина, аэрофототүсірілім, білім беру, логистика және ақпараттық технологиялар сияқты салаларда кеңінен қолданылады. Тараз – студенттер ұшқышсыз ұшатын аппараттардың өндірісін де, пайдалануын да оқи алатын Қазақстандағы алғашқы қала.
