5 жылда жұмыс күші тапшы өңірлерден 103 мың адам көшіп кеткен

АСТАНА. KAZINFORM — Жұмыс күші тапшы өңірлерге азаматтарды 1 млрд-тан астам теңгеге жалған құжаттар негізінде көшіру фактілері анықталды. Бұл туралы Еңбек және халықты әлеуметтік қорғау министрлігінің кеңейтілген алқа мәжілісінде ведомство басшысы Светлана Жақыпова айтты.

Оның атап өтуінше, 2024 жылдың қорытындысында көші-қон саясаты тұжырымдамасының нысаналы индикаторларына тұтастай алғанда қол жеткізілді. Сонымен бірге көші-қон процестері халық санына әсер етеді. Соңғы 5 жылда халықтың ең көп азаюы Солтүстік Қазақстан және Қостанай облыстарында байқалады.

— Көп жағдайда көші-қон өңірлердің инфрақұрылым сапасының төмендеуіне, тіршілікті қамтамасыз ету жағдайларына, тұрақты жұмыспен қамту мүмкіндіктерінің жоқтығына және басқаларына байланысты мәжбүрлі сипатта болады. Жұмыс күші тапшы өңірлерден 5 жыл ішінде халықтың біржолата көшіп кетуі 103,1 мың адамды құрады. Бұл ретте басқарылатын ағын есебінен кеткен халықтың 31 пайызы өтелді, — деді ол.

Светлана Жақыпованың айтуынша, қоныс аударуды ынталандыру үшін экономикалық ұтқырлық сертификаты енгізілді. Қоныс аударушыларға бес жыл мерзімге жерді уақытша пайдалануға ауыл шаруашылығы мақсатындағы жер учаскелерін алуда жеңілдіктер берілді. Қоныс аударушыларға төленетін субсидиялар банктер мен өзге де қаржы ұйымдары алдындағы несиелік міндеттемелер бойынша өндіріп алудан қорғалған. 2024 жылдан бастап Еңбек мобильділігі орталықтары қоныс аударушылар мен қандастардың отбасыларын жергілікті қоғамдастыққа біріктіру үшін сүйемелдеуді жүзеге асырады. 25 жаңа бейімдеу және интеграциялық қызметтер енгізілді.

— Сонымен бірге өткен жылы қоныстандырудың барлық өңірінде прокуратура 1 млрд-тан астам теңгеге азаматтарды жалған құжаттар негізінде көшіру фактілерін анықтады. Осыған байланысты біз жылжымайтын мүлікпен жалған мәмілелерді болдырмау үшін ерікті қоныс аудару кезінде құжаттарды ұсынуға қойылатын талаптарды күшейттік. Қазіргі уақытта Парламент Сенатының жанынан жұмыс тобы құрылды. Оның аясында ерікті қоныс аудару тетігін жетілдіру, көші-қон процестерін реттеу саласындағы мемлекеттік бақылауды күшейту бойынша ұсынымдар пысықталуда, — деді министр.

Еске сала кетейік, бұған дейін солтүстікке қоныс аударуда жымқырылған қаржыға қатысты Еңбек және халықты әлеуметтік қорғау министрлігі мәлімдеме жасағанын жазған болатынбыз.