6 сәуір. Жылнама
Kazinform оқырман назарына 6 сәуірге арналған атаулы күндер мен есте қалар оқиғалар күнтізбесін ұсынады.

АТАУЛЫ КҮНДЕР
Дүниежүзілік үстел теннисі күні
Алғаш рет 2015 жылы аталып өтті. Жаңа спорттық датаның бекітілуіне Халықаралық үстел теннисі федерациясы (International Table Tennis Federation, ITTF) мұрындық болды. Мақсат – осы спорт түрін кеңінен таныту, оны әртүрлі елдерде дамыту, тенниспен айналысатын адамдарды біріктіру және салауатты өмір салтын насихаттау.
Бейбітшілік пен даму үшін халықаралық спорт күні
2013 жылы 23 тамызда БҰҰ Бас Ассамблеясы бекіткен. Кез келген елде спорттың алуан түрін насихаттайтын спорттық қоғамдастықтар бар. Спортпен шығу тегі мен әлеуметтік жағдайына қарамастан әрбір адам шұғылдана алады. Ал спорттық шаралардың алуандығы және ерекше сипаты бейбітшілікті дамытып, нығайта түсетін маңызды факторға айналды.
ЕСТЕ ҚАЛАР ОҚИҒАЛАР
1992 жылы Казақстан Республикасы мен Канада, Казақстан Республикасы мен Палестина мемлекеті арасында дипломатиялық қатынастарды орнату туралы ноталар алмасты.
1993 жылы Қазақстан Республикасының Президенті Нұрсұлтан Назарбаев пен «Шеврон» (АҚШ) мұнай корпорациясының басқарма төрағасы Кеннет Дерр «Теңізшевройл» бірлескен кәсіпорнын құру туралы келісімге қол қойды. «Теңізшевройл» - Қазақстандағы мұнай және газ өндіретін ең ірі компания.
1995 жылы Қарағанды қаласында ғалым Ебіней Бөкетов тұрған үйге ескерткіш тақта орнатылды.
1999 жылы Алматы облысы Көксу ауданының Балпық би кентінде батыр, шешен, Балпық биге ескерткіш орнатылды.
2012 жылы Тампа қаласында (АҚШ, Флорида штаты) өткен «Гаспарилла» халықаралық кинофестивалінде танымал голливуд актері, режиссер Арман Ассантенің Қазақстан туралы «Дала диалогы» фильмі үздік қысқаметражды деректі фильм ретінде жүлдеге ие болды. Қазақстан жайлы 27 минуттық фильм өзін продюсер, сценарист және режиссер ретінде сынап көргісі келген шетелдік танымал актердің көзқарасымен түсірілді. Қазақстан туралы фильм – оның алғашқы жұмыстарының бірі.
2014 жылы Ұлыбританияда Қазақ әдебиетінің апталығы өтті. Іс-шараны Kazakh Arts Academy ұйымдастырып, Біріккен Корольдіктегі Қазақстан Республикасының елшілігі қолдау білдірген. Іс-шарада белгілі қазақ драматургі Дулат Исабековтің туындысы алғаш рет ағылшын тілінде ұсынылды.
2015 жылы «Нұрлы жол» жаңа экономикалық белдеуі аясында Каспийде Құрық портында паром кешенінің құрылысы басталды.
2017 жылы жамбылдық ғалымдар Владимир Ким және Мұқатай Немеребаев Франкфурттағы (Германия) 2016 жылғы Халықаралық кітап жәрмеңкесінің алтын медаль иегері атанды.
2017 жылы Батыс Сахарада (MINURSO) бейбітшілік пен қауіпсіздікті қолдау жөніндегі БҰҰ миссиясына қатысып жатқан Қазақстан Қарулы Күштерінің офицері подполковник Данияр Исмаилов күштер қолбасшысының өкімімен штабтың оқу бөлімі бастығы лауазымына тағайындалды. Жаңа лауазымда Данияр Исмаилов оқыту стандарттарына, өздеріне жүктелген тапсырмаларды тиімді орындау үшін барлық әскери бақылаушылардың дайындығы мен әзірлігіне жауап береді. Одан басқа, қазақстандық офицер БҰҰ-ның миссиясына қатысу үшін келген әскери және азаматтық персоналдан ағылшын тілінен емтихан қабылдайды және оған жетекшілік етеді.
2018 жылы Түркияда түркі әлеміне ортақ тарихты қамтитын оқулық мектеп бағдарламасына таңдау пәні ретінде енгізілді. Қазақстанда шығарылған оқулықты Халықаралық Түркі академиясы (TWESCO) әзірлеп шығарған. Осы оқулықпен Қазақстанда Назарбаев зияткерлік мектебінің оқушылары да оқиды.
2019 жылы «Литвадағы Қазақстан көктемі» фестивалінің салтанатты ашылуында атақты қазақстандық режиссер Ақан Сатаевтың «Анаға апарар жол» фильмі көрсетілді.
2020 жылы Түркияның «Анадолы» ақпарат агенттігіне 100 жыл толды. 1920 жылы 31 Наурызда Гейв қаласының теміржол станциясында Мұстафа Кемал Ататүрікпен кездесуге қатысқан журналистер Юнус Нади мен Халиде Эдиб Ұлттық ақпараттық агенттік құру идеясын айтты. Агенттіктің атауы «Түрік», «Анкара», «Анадолы» деп ұсынылған үш атаудың ішінен таңдап алынды. 6 сәуірде агенттіктің ресми ашылуы өтті. Агенттіктің жаңалықтары түрік, албан, ағылшын, араб, босния, күрд, македон, парсы, орыс және француз тілдерінде шығады. «ҚазАқпарат» Халықаралық ақпарат агенттігі мен «Анадолы» агенттігі арасында өзара ынтымақтастық туралы келісімге Ыстанбұлда 2018 жылдың 10 сәуірінде қол қойылған еді.
2021 жылы Қарағанды облысы Шет ауданы Мойынты ауылында Таңыбай Бекназарұлының ескерткіші ашылды. Таныбай Бекназарұлы (1670-1755) - Орта жүздің Арғын руынан шыққан, қазақ халқының тәуелсіздігі үшін күрескен батыр. Жоңғарларға қарсы шайқастардың бірінде жаудың бас батыры Қапалды жеңіп шығады.
2022 жылы Бибісара Асаубаева әйелдер арасында блиц бойынша әлем чемпионы атанған ең жас шахматшы әйел ретінде Гиннестің рекордтар кітабына енді. 2021 жылы Польшада өткен шахматтан әлем чемпионатында жеңіске жеткені үшін Гиннестің дүниежүзілік рекордтар ұйымы Бибісара Асаубаеваға сертификат табыс етті.
2022 жылы Қазақстан таэквондо спортынан тарихи жетістікке қол жеткізді. Қазақстандық таэквондошы – Қорғаныс министрлігінің орталық спорт клубының спортшысы Жансель Дениз жаңартылған әлемдік рейтингте бірінші орынға көтерілді.
2024 жылы Қазақстан президенті Қасым-Жомарт Тоқаев су тасқынынан туындаған күрделі жағдайға байланысты үндеу жасады. Су тасқынына байланысты еліміздің он облысында (Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында) жергілікті төтенше жағдай режимі жарияланды. Премьер-Министр басқаратын Республикалық штаб құрылды. Төтенше жағдайлар министрлігінің барлық ресурстары, сондай-ақ Ішкі істер министрлігінің, Ұлттық ұланның, Қарулы Күштердің және Ұлттық қауіпсіздік комитетінің күштері апатпен күресуге жұмылдырылды. Зардап шеккен өңірлердің әкімдіктері күні-түні жұмыс істеп, он мыңдаған еріктілер оларға жергілікті жерлерде көмек көрсетті.