7 қараша. Тұлғалар туған күн

ЕСІМДЕР

65 жыл бұрын (1958) Қазақстан Республикасы Жоғарғы сотының судьясы Мейрамбек Таймерденұлы ТАЙМЕРДЕНОВ дүниеге келген.

Алматы облысында туған. 1983 жылы Талдықорған заң техникумын, 1993 жылы Әл-Фараби атындағы Қазақ мемлекеттік ұлттық университетін бітірген.

Еңбек жолы: 1977 жылы Қастек асыл тұқымды мал зауытының жұмысшысы, слесарі, ҚКП ОК баспасы баспагерінің оқушысы болды. 1983-1992 жылдары Алматы облысы Қаскелең аудандық сотының сот орындаушысы, аға сот орындаушысы, 1992-1993 жылдары Қазақ көлік прокуратурасының кеңсе бастығы - прокурордың көмекшісі, 1994-1995 жылдары ҚР Бас прокуратурасының Жалпы қадағалау басқармасында көліктегі заңдардың орындалуын қадағалау жөніндегі бөлім прокуроры, Алматы облысы Қаскелең аудандық прокурорының көмекшісі, 1995-1997 жылдары прокурор, аға прокурор, ҚР Бас прокурорының көмекшісі, 1997-1999 жылдары Алматы облысы Жамбыл аудандық сотының судьясы, 1999-2000 жылдары Алматы облыстық сотының судьясы, 2000-2001 жылдары Алматы облыстық Әділет басқармасының бастығы, 2001-2006 жылдары ҚР Әділет министрлігі Тіркеу қызметі комитетінің төрағасы, 2006-2007 жылдары ҚР Жоғарғы соты жанындағы Сот әкімгерлігі жөніндегі комитет төрағасының орынбасары, 2007-2012 жылдары Алматы облыстық сотының төрағасы, 2012-2013 жылдары Алматы қалалық сотының төрағасы, 2013-2019 жылдары Алматы облыстық сотының төрағасы қызметін атқарды. 2019-2021 жылдары ҚР Жоғарғы сотының азаматтық істер жөніндегі сот алқасының төрағасы.

2019 жылдың сәуір айынан бастап қазіргі қызметінде.

«Парасат» орденімен, «Ерен еңбегі үшін», «ҚР Тәуелсіздігіне 10 жыл», «ҚР Конституциясына 10 жыл», «Астананың 10 жылдығы», «ҚР Тәуелсіздігіне 20 жыл», «ҚР Конституциясына 20 жыл» «Конституциялық заңдылықты нығайтуға қосқан үлесі үшін», «Мінсіз қызметі үшін» (ІІІ-дәрежелі) медальдарімен, «Сот жүйесінің құрметті қызметкері» төсбелгісімен, «Үш би» құрмет белгісімен марапатталған.

54 жыл бұрын (1969) Алматы қаласы полиция департаментінің бастығы Арыстанғани Расылханұлы ЗАППАРОВ дүниеге келген.

Жамбыл облысында туған. 1993 жылы Әл-Фараби атындағы Қазақ мемлекеттік ұлттық университетін, 2002 жылы ҚР ІІМ Академиясының Заң институтын бітірген. Полиция полковнигі.

Еңбек жолы: 1993-2001 жылдары Жамбыл, Алматы облыстарының ІІБ, Алматы қаласының ҚІІБ жедел құрам лауазымындарында қызмет атқарған. 2001-2010 жылдары Алматы облысының жедел бөліністерінің басшылық лауазымдарында жұмыс істеген, 2010-2012 жылдары Алматы облысы ІІД Криминалдық полиция басқармасының бастығы, 2012-2013 жылдары Алматы қаласының және Ақмола облысының ІІМ қалалық органдарының бастығы, 2013-2014 жылдары Көліктегі ІІД Криминалдық полиция басқармасының бастығы, 2014-2016 жылдары ҚР ІІМ Өзіндік қауіпсіздік департаменті бастығының орынбасары, 2016-2017 жылдары Ақтөбе облысының ІІД бастығының бірінші орынбасары, 2018-2019 жылдары ҚР Қазақстан ІІМ Есірткі қылмысына қарсы іс-қимыл департаментінің бастығы, 2019 жылы Қызылорда облысы полиция департаментінің бастығы, 2019-2022 жылдары ҚР ішкі істер министрінің орынбасары. 2022 жылы – Алматы облысы полиция департаментінің бастығы.

2022 жылдың шілде айынан бастап қазіргі қызметінде.

ҚР Ішкі істер министрлігінің құрметті қызметкері. «Айбын» ІІ-дәрежелі орденімен, «ҚР Конституциясына 20 жыл», «ҚР Тәуелсіздігіне 25 жыл» медальдарымен және ведомстволық медальдарымен марапатталған.

51 жыл бұрын (1972) «Отбасы банк» АҚ басқарма төрағасы Ләззат Еркінқызы ИБРАГИМОВА дүниеге келді.

Ақмола облысында туған. Ақмола ауыл шаруашылығы институтын, Л.Н.Гумилев атындағы Еуразия ұлттық университетін бітірген.

Еңбек жолы: 1995 жылы Л.Н.Гумилев атындағы Еуразия ұлттық университетінің оқытушысы. 1999-2004 жылдары ІІ шақырылған ҚР Парламенті Мәжілісінің депутаты, Халықаралық істер, қорғаныс және қауіпсіздік комитетінің мүшесі, «Ақиқат» депутаттық тобының жетекшісі. 2004-2009 жылдары «Даму» кәсіпкерлікті дамыту қоры» АҚ құрылымдық бөлімшелерінің басшысы. 2009 жылғы қаңтар-тамыз айларында «Самұрық-Қазына» ҰӘҚ» АҚ қаржы институттарын және нарық институттарын басқару жөніндегі дирекцияның бас менеджері. 2009 жылы «Даму» кәсіпкерлікті дамыту қоры» АҚ басқарма төрағасының орынбасары. 2011-2016 жылдары «Даму» кәсіпкерлікті дамыту қоры» АҚ басқарма төрағасы. 2016-2017 жылдары «Бәйтерек» Ұлттық басқарушы холдингі төрағасының орынбасары. «Қазақстанның тұрғын үй құрылыс жинақ банкі» АҚ басшысы, «Отбасы Банкі» АҚ Директорлар кеңесінің мүшесі, басқарма төрағасы қызметтерін атқарды.

2020 жылдың мамыр айынан бастап қазіргі қызметінде.

«Парасат», «Құрмет белгісі» ордендерімен, медальдармен, соның ішінде «Найрамдал» (Моңғолия) медалімен марапатталған.

48 жыл бұрын (1975) Қазақстан Республикасының Вьетнам Социалистік Республикасындағы Төтенше және Өкілетті Елшісі Қанат Қобыландыұлы ТУМЫШ дүниеге келген.

Ақтөбе қаласында туған. 1997 жылы Әл-Фараби атындағы Қазақ ұлттық университетін халықаралық экономикалық қатынастар бакалаврі, 1999 жылы Әл-Фараби атындағы Қазақ ұлттық университетін халықаралық экономикалық қатынастар магистрі дәрежесімен бітірген.

Еңбек жолы: 1997-1998 жылдары ҚР Сыртқы істер министрлігі Мемлекеттік протокол басқармасында референт, атташе, 1998-1999 жылдары ҚР Сыртқы істер министрлігінің Көпжақты экономикалық ынтымақтастық департаментінің Көпжақты ынтымақтастық департаментінің үшінші хатшысы, 1999-2001 жылдары ҚР Түркиядағы Консулдығында вице-консул, 2001-2003 жылдары ҚР Түркиядағы Консулдығында Елшінің көмекшісі, баспасөз хатшысы, 2003 жылы ҚР Сыртқы істер министрлігінің Көпжақты экономикалық ынтымақтастық департаментінің Көпжақты ынтымақтастық департаментінің екінші хатшысы, 2003-2005 жылдары ҚР Орталық және Шығыс Еуропа елдеріндегі Елшілігінің консулдық бөлімнің меңгерушісі, 2005-2006 жылдары ҚР Сыртқы істер министрлігінің Көпжақты экономикалық ынтымақтастық департаментінің Көпжақты ынтымақтастық департаментінің бірінші хатшысы, 2006-2007 жылдары ҚР Сыртқы істер министрлігінің Азиялық ынтымақтастық басқармасынде кеңесші, бөлім басшысы, 2007-2009 жылдары ҚР Сыртқы істер министрлігінің Жалпыазиялық ынтымақтастық департаментінің Азиядағы қауіпсіздік басқармасының басшысы, 2009-2010 жылдары ҚР Сыртқы істер министрлігінің Жалпыазиялық ынтымақтастық департаменті директорының орынбасары, 2010-2014 жылдары «Азиядағы өзара іс-қимыл және сенім шаралары кеңесі» халықаралық ұйымы Атқарушы директорының орынбасары, 2014-2015 жылдары ҚР сыртқы істер министрінің кеңесшісі; 2015-2016 жылдары ҚР БҰҰ жанындағы Тұрақты Өкілдігінде кеңесші-уәкіл, 2016-2019 жылдары ҚР БҰҰ жанындағы Тұрақты Өкілінің орынбасары, 2019-2023 жылдары Оңтүстік Африка Республикасындағы Төтенше және Өкілетті Елшісі, 2023 жылы ҚР Сыртқы істер министрінің орынбасары қызметіне тағайындалды.

2023 жылдың тамыз айынан бастап қазіргі қызметінде.

«Қазақстан халқы Ассамблеясына 20 жыл», «Халықаралық әскери достастықты дамытқаны үшін», «ҚР дипломатиялық қызметіне 25 жыл», т.б. көптеген медальдармен, грамоталармен марапатталған.

45 жыл бұрын (1978) «ҚазМұнайГаз» Ұлттық компаниясы» АҚ басқарма төрағасы, директорлар кеңесінің мүшесі Мағзұм Маратұлы МЫРЗАҒАЛИЕВ дүниеге келді.

Алматы қаласында туған. «Тұран» университетін, Сыртқы істер министрлігінің дипломатия академиясын, Ш.Есенов атындағы Қазақ мемлекеттік технология және инжиниринг университетін бітірген.

Еңбек жолы: 2001-2004 жылдары Теңіз және Батыс Сібір кеніштерінде «MIDrillingFluidsInternational» (Schlumberger) бұрғылау ерітінділері жөніндегі инженер, 2004-2007 жылдары «MIDrillingFluidsInternational» Ақтау филиалында бизнесті дамыту менеджері, өндіріс жөніндегі менеджер, филиал басшысы. 2007-2010 жылдары «ҚазМұнайГаз» ҰК» АҚ «ТеңізСервис» ЖШС бас директоры, 2010-2012 жылдары «ҚазМұнайГаз» ҰК» АҚ басқарушы директоры, 2010-2013 жылдары «ҚазМұнайГаз» ҰК» АҚ басқарма төрағасының инновациялық дамыту және сервистік жобалар жөніндегі орынбасары, 2013-2014 жылдары ҚР мұнай газ вице-министрі, 2014-2019 жылдары ҚР энергетика вице-министрі, 2019-2021 жылдары ҚР экология, геология және табиғи ресурстар министрі, 2021-2022 жылдары ҚР энергетика министрі, 2022 жылы ҚР Президентінің кеңесшісі қызметтерін атқарды.

2022 жылдың сәуір айынан бастап қазіргі қызметінде.

147 жыл бұрын (1876-1934) қазақ зиялыларының бірі, Алашорда үкіметінің мүшесі, қазақтың тұңғыш заң магистрі Жақып АҚБАЕВ дүниеге келген.

Семей облысы Қарқаралы уезі Берікқара болысы, №3 ауылының Төңіректас деген жерінде дәулетті отбасында туған. 1886 жылы Қарқаралы қаласындағы қазақ интернатында оқып, 1889 жылы Омбы гимназиясына түсіп, онда 7 жыл, онан кейін Томск гимназиясына ауысып, онда бір жыл оқып, 1898 жылы бітіріп шығады да, Санкт-Петербург университетінің заң факультетіне түседі. 1903 жылы І дәрежелі дипломмен бітіріп шығады. ЖОО-да оқып жүргенде ілім-білімнің әр саласын меңгеруге талаптанады. Адамның есте ұстау қабілеті мен фактілерді екшелеудің әдіс-тәсілдерін жете меңгеру үшін Одесса қаласындағы мнемоника профессоры С.Файнштейннен дәріс тыңдауға және Санкт-Петербургтегі Археология институтына оқуға түсуге университет басшыларына өтініш те жазады. Мемлекеттік сынақ комиссиясында «Қазақтардың некелік құқығы» атты тақырыпты қорғауға бекітеді.

Кейін осы тақырыпты түрмеде отырғанда ары қарай жалғастырып, кеңейтіп, 1907 жылы Орыс географиялық қоғамының Семей бөлімшесінің жазбаларында жариялайды. ЖОО бітірісімен Омбы сот палатасына қызметке тұрады. 1905 жылғы тамызда Омбы қаласындағы 2-учаскенің бітімші соты болады. Кеңес өкіметі орнаған соң ол Семей губревкомының заң бөлімінде жұмыс істеп, оның «етене араласуымен губерния бойынша сот-тергеу учаскелері құрылады». Біраз уақыт Семей кеңестік халық сотының мүшесі болады, Қарқаралы уездік халыққа білім беру бөлімінде және Семейде әр түрлі қызметтер атқарады. Ақбаев басқа да Алаш қайраткерлері сияқты сталиндік зобалаңға түсіп, Воронежге жер аударылып, ол жақтан ауруына байланысты елге қайтарылып, 1934 жылы 4 шілдеде Алматыда қайтыс болды.