98 жыл бұрын «Еңлік-Кебек» пьесасы алғаш рет киіз үй сахнасында қойылды
Қойылымның қоюшы-режиссері де, суфлері де Мұхтар Әуезов болған. Шығарма 1922 жылы жазылды және 1943 жылы жаңа нұсқасымен жарық көрді. Еңлік Кебек пьесасын жазған кезде М.Әуезов 21 жаста болатын. «Еңлік-Кебек» - екі жастың махаббатын жыр ететін шығарма. Еңлік пен Кебек туралы хикаялар оқиға болған 18 ғасырдан бастап ел арасына кең тараған. Алғашқы жазба дерек 1892 жылы «Дала уалаяты» газетінің отыз бірінші және отыз тоғызыншы сандарында жарияланған «Қазақтардың естерінен кетпей жүрген бір сөз» деген мақалада келтіріледі. Бүгінгі күнде жыр түрінде жеткен «Еңлік - Кебек» дастанының екі нұсқасы белгілі. Оның біріншісі - 1912 жылы Семейдегі «Жәрдем» баспасынан жеке кітап болып жарық көрген, Абай ұсынған тақырып бойынша Шәкәрім жазған «Жолсыз жаза яки кез болған іс» деген шығарма да, екіншісі - Мағауия Абайұлы жазған «Еңлік - Кебек» дастаны. Шәкәрім нұсқасы 1988 жылы қайта жарық көрді. Бұл поэма 652 жолдан тұрады. Мұхтар Әуезовтің жеке кітапханасында сақталған Мағауия Абайұлы дастанын 1941 жылы Қайым Мұқаметханов баспаға әзірлеген. Бұл қолжазба тек 1960 жылы баспадан шығарылған «Дастандар» деген жинақта алғаш рет жарияланды. Жазушы Әуезов осы дастанның арқауымен осы аттас трагедия жазды. Шығыс Қазақстан облысы Абай ауданында дастан кейіпкерлері Еңлік пен Кебекке ескерткіш орнатылған. Құрылысқа жергілікті халық шеберлері өңдеген қызыл, күрең және ақшыл сұр түсті гранит, цемент, құм, алебастр, әк, жоса пайдаланылған. Төрткіл алаңның ортасынан 4 қабырғалы күмбез-тұғыр соғылып, оның үстіне орнатқан биікте 6 метрлік мұнара мен күмбез түйісетін дөдегені керегекөз өрнекпен әшекейлеген. Күмбездің 4 жағында шығыстық мәнермен ойып шығарылған 4 арка бар. Олардың маңдайшасында «Еңлік - Кебек» деген егіз есім әсемдеп жазылған. Ескерткіштен батысқа қарай 8-9 км жерде 1917 жылы 7 маусымда М.Әуезовтің «Еңлік - Кебек» пьесасы осы арада алғаш рет киіз үй сахнасында қойылды» деп жазылған тағы бір ескерткіш бар.