Ә. Қастеев атындағы өнер музейінің директоры ғылыми сараптамаларға жабдықтардың жетіспейтіндігін мәлімдеді
Өзінің кіріспе сөзінде мұражай директоры Гүлмира Шалабаева музейде ғылыми сараптамалар жүргізуге арнайы жабдықтардың жетіспей жатқандығын алға тартты.
«Бізде сапалы ғылыми сараптамалар жүргізу үлкен мәселеге айналды. Қазір, коллекционерлер көбейіп жатыр. Ал бұл, қалада өмір сүру деңгейінің және ұлттық өнерге деген қызығушылықтың артып жатқандығын көрсетеді. Бұған қоса, галереялар көптеп ашылып жатыр. Олар топтамалар жасауға ұмтылуда. Сәйкесінше, жалған туындылар пайда болып жатыр. Соның салдарынан ғылыми сараптамаға деген сұраныс артып отыр. Біздің музейде сараптама бойынша ең мықты мамандар жұмыс істейді. Олар өз тәжірибелеріне, біліктілігіне сүйеніп сараптама жасайды. Сол үшін бізге жабдықтар қажет. Біз кезінде жеке қорларға да ҚР Мәдениет және спорт министрлігіне де жүгінгенбіз. Бірақ, әзірге нәтиже жоқ», - деді Г. Шалабаева.
Өз кезегінде депутат музей қызметкерлеріне техника-экономикалық негіздемемен жұмыс істеу керектігін айтты.
«Жабдықтар жетіспейді дейсіздер ме? Не себептен жоқ екендігі түсінікті. Бұл жерде техника-экономикалық негіздемемен жұмыс істеу керек. Халықаралық тәжірибелерді ескерген жөн.
Музей саласында тар көлемді мамандар жетіспейді. Мұндай мамандарды оқыту қажет. Бірақ, ол мамандықтарды жастар таңдағысы келмейді. Бұл мамандарға әлі мәдени баға берілген жоқ. Батыста кең ауқымды бәссаудалар өтеді. Ал бізде өтпейді. Біз оларға қатыспаймыз. Мен музейлердің басшыларына музей қызметкерлеріне қатысты олардың қызметтерінің мақсатқа сәйкестілігі және сапасына қарай экономикалық ынталандыру жүйесін ұсындым. Бізде қазір құқықтық база жоқ. Оған қатысты өзгерістер алдағы қараша айында қабылданатын болады», - деді депутат.