А/Н1N1 тұмауына шұғыл диагностика жасауға қажетті тест жүйелерді сатып алуға 1 млн. 850 мың теңге қажет - А. Белоног

АСТАНА. Мамырдың 5-і. ҚазАқпарат /Ернұр Ақанбай/ - Денсаулық сақтау министрлігінің есеп-қисабы бойынша, республикалық санитарлық-эпидемиологиялық станса зертханасында А/Н1N1 тұмауына шұғыл диагностика жасауға қажетті тест жүйелерді сатып алу үшін 1 млн. 850 мың теңге қажет.

Бұл туралы бүгін Астанадағы баспасөз мәслихатында Қазақстанның бас санитарлық дәрігері Анатолий Белоног мәлім етті, деп хабарлайды ҚазАқпарат. Сонымен қатар, А. Белоног аталмыш тұмаудың елімізге кіріп кетпеуі үшін басқа да мүдделі мемлекеттік органдар қолға алып жатқан шараларға тоқталды. «Ауыл шаруашылығы министрлігінің Ветеринария комитеті әлемнің 11 елінен доңыз етін импорттауға тыйым салды. Бұдан бөлек, Төтенше жағдайлар министрлігі еліміздегі халықтың түрлі топтары арасында инфекцияның таралуына жол бермеу үшін іс-шаралар жоспарын әзірледі. Сондай-ақ Білім және ғылым министрлігі А/Н1N1 тұмауына қарсы вакцина жасау үшін ғылыми зерттеулер жүргізетін болады», деді А. Белоног. А. Белоног А/Н1N1 тұмауына қарсы еліміздегі мүдделі мемлекеттік органдардың атқарып жатқан жұмыстары вице-премьер Серік Ахметов басқаратын Қазақстанда доңыз тұмауының пайда болуын және таралуын болдырмау жөніндегі ұсыныстарды дайындау үшін құрылған жұмыс тобының кезекті отырысында, мамырдың 7-сі күні егжей-тегжейлі қаралатынын айтты.