Абаттандыру, автобус бағытын іске қосу: елорда әкімімен кездесуде тұрғындар қандай мәселелерді көтерді
АСТАНА. ҚазАқпарат – Бүгін елорда әкімі Жеңіс Қасымбек қаладағы құрылысы ұзаққа созылған бірқатар тұрғын үйлердің үлескерлерімен кездесті, деп хабарлайды ҚазАқпарат.
Кездесу барысында көтерілген мәселелер туралы бүгін қала әкімі өзінің Facebook парақшасында жазды, деп хабарлайды ҚазАқарат.
«Қаладағы құрылысы ұзаққа созылған нысандарды аралауды жалғастырамын. Көппәтерлі үш тұрғын үй кешендерінің үлескерлерімен қайта кездестім. Олар - «Коргалжынский квартал», «Комсомольский», «Арыстан» тұрғын үй кешендері. Құрылыстың тоқтап қалмауы және үлескерлердің жұмыс нәтижесін көргені маңызды, сол себепті құрылыс алаңдарында тұрақты түрде кездесу өткіземіз»,-деді әкім.
Оның сөзінше, тұрғын үй кешендерінің жағдайы қиын болатын. Мәселен «Арыстан» тұрғын үй кешенінің құрылысы 11 жыл бұрын басталған. Нысанды тапсырар кезде небәрі 20-30%-ға дайын еді. Мұнда 450-ге тарта үлескер отбасы пәтерін күтіп жүрді. Тұрғын үй кешені бірнеше блоктан тұрады, олардың бір бөлігі аяқталып, үлескерлерге пәтер кілті табыс етілді. Қалған блоктар да аяқталады. «Комсомольский» тұрғын үй кешені 8 жыл бұрын проблемалы деп танылған. Мұнда 600-ден астам үлескер отбасы бар.
«Үлескерлер кездесулерде инженерлік желілер салу, абаттандыру, қосымша автобус бағытын іске қосу секілді өзге де мәселелерді көтереді. Біз өз тарапымыздан мердігерлерге барынша көмек көрсетеміз. Біздің міндетіміз - құрылысы ұзаққа созылған нысандарды аяқтап, үлескерлерге баспана кілтін табыс ету»,-деді Жеңіс Қасымбек.
Осыған дейін елордада екі жыл ішінде 40-тан астам жайлы мектеп салынатынын хабарлаған болатынбыз.
