Абай облысында 100-ге жуық көлік қар құрсауында қалды
СЕМЕЙ. KAZINFORM — Абай облысында қатты боран салдарынан көліктер жолда қалып жатыр.
«Қазавтожол» ҰК мәліметіне сүйенсек, кеше сағат 23:00–ден бастап «Алматы-Талдықорған-Өскемен» тасжолының Таскескен ауылы мен Аягөз қаласы аралығындағы жол жабылды.
— Әуелі жүк көліктерінің, кейін жеңіл көліктердің қозғалысына тыйым салынды. Барлығы 100-ге жуық көлік қар құрсауында қалып қойған. Оларға көмектесу үшін 20-ға жуық ауыр техника жұмылдырылды, — делінген ақпаратта.
Жол қызметтері 60-тан астам көлікті қардан шығарды. Аягөз қаласына 3 автобус жеткізілді.
Жылыту пунктіне 77 адам, оның ішінде үш бала орналастырылды.
Қазіргі уақытта Таскескен мен Аягөз арасындағы жол учаскесі әлі де жабық тұр.
Еске салсақ, бұған дейін әлеуметтік желіде Өскемен қаласында төтенше жағдай енгізілгені туралы тарап жатқан ақпарат шындыққа сәйкес келмейтіндігі хабарланған.
