Абайдың 180 жылдығы: 180 шақырымдық ультрамарафонда батысқазақстандық желаяқ топ жарды
АСТАНА. KAZINFORM — Абайдың 180 жылдығына орай Абай облысында 180 шақырымдық республикалық «Abai Joly 100 miles» ультрамарафоны мәресіне жетті.
Аталмыш жарысқа Қазақстанның барлық өңірінен, сондай-ақ Ресей, Қытай және Өзбекстаннан 30-дан астам желаяқ қатысты.
Жүлде қоры – 10 млн теңге. Абсолютті чемпионға JETOUR X50 автокөлігі беріледі деп жоспарланған.
Ультрамарафон 7 тамыз күні сағат 17.00-де Семейде басталып, бүгін Қарауылтөбеде аяқталды.
Батысқазақстандық желаяқ, 31 жастағы Баубек Ілиясов 180 шақырымдық қашықтықты 19 сағат 9 минут 45 секундта бағындырып, жеңімпаз атанды.
Батыс Қазақстан облысының Казталов ауданында туып-өскен Баубек Ілиясов – осыған дейін де марафондық қашықтықтарда бақ сынап, жүлде алып жүрген желаяқ.
Еске сала кетейік, бұдан бұрын батысқазақстандық желаяқтың 230 шақырымды жүгіріп өткенін жазған едік.
