Әбиба Әбужақынова: Басты мақсатым – Олимпиаданың финалына жетіп, алтынға таласу

АСТАНА. KAZINFORM — Парижде өтетін XXXIIІ Жазғы Олимпиада ойындарына дзюдодан Қазақстан ұлттық құрама командасынан 8 дзюдошы қатысады. Бүгін олар Парижге аттанады.

Аталған додада қазақ жанкүйерлері дзюдодан ерлер арасында Елдос Сметовқа үміт артса, әйелдер арасында Әбиба Әбужақыновадан медаль күтіп отырғаны анық. Әбужақынова Олимпиадаға аттанып бара жатып, Kazinform тілшісіне эксклюзив сұхбат беріп, Олимпиада алдындағы басты мақсатын айтып берді.

«Әр спортшының арманы – Олимпиада алтыны. Менің де арманым сол алтынға қол жеткізу. Финалға дейін сүрінбей жетіп, алтынға талассам деген мақсатпен Парижге аттанып бара жатырмын», - деді спортшы.

Сонымен қатар Олимпиада алдындағы оқу-жаттығу жиындары өте жоғары деңгейде өткенін, Олимпиадаға 100 пайыз дайын екенін де жасырмады.

«Олимпиада алдындағы оқу-жаттығу жиындары өзімнің ойлағанымыдай өтті. Олимпиадаға 100 пайыз дайынмын. Осыған дейінгі қатысқан әлемдік додаларда жүлдесіз қайтқан жоқпын. Бұл жолы да жүлдеге қол жеткізу басты мақсатым. Мен 27 шілде күні әйелдер арасында бірінші болып, жарысқа шығамын. Маған жанкүйер болыңыздар», - деді Әбиба Әбужақынова.

Естеріңізге сала кетейік, дзюдодан әйелдер арасында Әбиба Абужақынова (48 кг), Камила Берліқаш (+78 кг), Эсмигүл Куюлова ел намысын қорғайды.

Айта кетейік, Қазақстан құрамасы Олимпиада ойындарына спорттың 25 түрінен 92 жолдама жеңіп алды.

Франция астанасы Париж қаласында өтетін XXXIII жазғы Олимпиада ойындары 26 шілде мен 11 тамыз аралығына белгіленген.

Ойынға әлемнің 205 елінен 10 500 спортшы қатысады.

Онда 32 спорт түрінен 329 медаль жиынтығы сарапқа салынады.