Абу-Дабиде ұшқышсыз жүйелердің (UMEX) жетістігін насихаттайтын ірі көрме өтеді
АСТАНА. KAZINFORM – Абу-Даби билеушісінің орынбасары – шейх Хазза бин Заид Әл Нахаянның қамқорлығымен 23-25 қаңтар аралығында Абу-Даби ұлттық көрме орталығында ең ірі жергілікті және әлемдік мамандандырылған компаниялардың қатысуымен ұшқышсыз жүйелер (UMEX) және модельдеу мен оқыту (SimTEX) бойынша көрме өтеді. Бұл туралы Wam сайты жазды.
Бұл мәлімдеме Абу-Даби ұлттық көрме орталығында өткен баспасөз мәслихатында жасалды. Онда ADNEC Group-тың Қорғаныс министрлігімен бірлесіп ұйымдастырған ең ірі көрме мен конференцияның басталуына соңғы дайындықтар талқыланды.
Ұйымдастыру комитетінің төрағасы генерал-майор Мүбарак Саид бен Гафан Аль Джабри бұл жолғы көрме бұрынғыдан да көлемді әрі жан-жақты өтетінін айтты.
Оның айтуынша шараның ауқымдылығы халықаралық бейбітшілік пен қауіпсіздікті сақтауда ұшқышсыз жүйелердің өсіп келе жатқанын көрсетеді. Сонымен қатар, бұл салалар мен олардың инновациялық жетістіктері ұлттық экономикалардың тұрақты дамуын қамтамасыз етуде шешуші рөл атқарады. Олар енді қорғаныс қолданбаларынан тыс, коммерциялық және азаматтық мақсаттарды қамтиды.
