Абзал Құспан Кеден қызметін дербес орган ретінде қалпына келтіруді ұсынды

АСТАНА. KAZINFORM – Мәжіліс депутаты Абзал Құспан Премьер-министр Олжас Бектеновтің атына кеден қызметіндегі проблемалар туралы сауал жолдады.

— 2014 жылы Үкімет қаулысымен Мемлекеттік кіріс комитеті құрылып, салық және кеден органдары біріктірілді. Алайда оның тиісті нәтиже бермей отырғанын қазіргі ахуал көрсетіп отыр. Салдарынан кедендік бақылаудың тиімділігі айтарлықтай төмендеп, сыбайлас жемқорлық қауіптері күшейіп кетті. Сонымен қатар, кеден қызметі өзінің құқық қорғау функциясын іс жүзінде жоғалтып, қарулар мен есірткі контрабандасын анықтау тоқтатылды. Халықаралық құқық қорғау ұйымдарымен жұмыс әлсіреп, білікті мамандар жүйеден шығарылды. Яғни бұл жағдай кедендік түсімдердің азаюымен қатар, шекара қауіпсіздігіне, ішкі тұрақтылыққа айтарлықтай қатер төндіріп отыр, — дейді депутат. 

Депутаттың айтуынша, 2014 жылдан бері бюджетке түсетін кедендік төлемдер оған дейінгі жылдармен салыстырғанда 2 есе, кедендік тексерулер нәтижесінде өндірілген төлемдер көлемі 3 есе, экономикалық контрабанда фактілерін анықтау 2 есе, тәркіленген есірткі заттарының көлемі 36 есе азайып кеткен.

— Бұрын жүргізілген реформаларға талдау жүргізу, олардың экономика мен ұлттық қауіпсіздікке әсерін бағалау қажет. Кеден қызметін дербес орган ретінде қалпына келтіріп, оған кедендік әкімшілендіру, бақылау және контрабандаға қарсы күрес міндеттерін жүктеу керек. Кеден қызметін дамыту доктринасын әзірлесек, бұл кедендік әкімшілендіру үлгісін қалыптастырады. Реформаның ашықтығын қамтамасыз ету үшін өзгерістерді бақылау үдерісіне қоғам, бизнес және сарапшылар қауымдастығын тарту ұсынылады, — деді Абзал Құспан.

Еске салсақ, Сенат кедендік баждардың үздіксіз аударылуына арналған заңды мақұлдаған болатын.