«Адемнің» жыры біткен жоқ» - баспасөзге шолу
***
«Кеше Астанада «Бас редакторлар клубы» қоғамдық бірлестігі Л.Н.Гумилев атындағы Еуразия ұлттық университетінің (ЕҰУ) қолдауымен «Журналистика мен бұқаралық коммуникацияның өзекті мәселелері» атты тақырыпта республикалық ғылыми-тәжірибелік конференция өткізді. Оған қоғам қайраткерлері, сала мамандары, ғалымдар мен сарапшылар, оқытушылар мен мәдениет қызметкерлері, студенттер, мемлекеттік ұйымдар мен БАҚ өкілдері қатысты. Болашағымызға бағдар берер «Мәңгілік Ел», «100 нақты қадам» және «Қазақстан-2050» Стратегиясының мақсат-мұраттары аясында отандық журналистика мен бұқаралық коммуникацияның міндеттерін және өзекті мәселелерін байыптауға арналған бұл алқалы жиынды ЕҰУ проректоры, ҚР ҰҒА корреспондент-мүшесі Дихан Қамзабекұлы ашты. Ол конференцияның мән-маңызына тоқтала келіп, әлемде, айналамызда болып жатқан түрлі оқиғаларды халыққа жеткізуде журналистердің алар орны ерекше екеніне назар аударды», - деп жазады «Егемен Қазақстан». Конференция барысында мінбеге көтерілген белгілі журналист, Парламент Сенатының депутаты Жабал Ерғалиев қозғалып отырған тақырыптың өзектілігін сөз ете отырып, журналистика саласына айрықша көңіл бөлінуі қажет екенін атап көрсетті. Осы жайында толық білгіңіз келсе, газеттегі «Журналистің цензурасы - өзінің ар-ұяты» атты көлемді мақаланы оқып шығыңыз.
Бас басылымда «Жекешелендірудің тиімді тәсілдері» деген мақала жарияланды. Үкімет мемлекет иелігінен алу бағытында және жекешелендіруге қатысты жаңа тәсілдерді қарастыруда. Олардың негізіне мемлекеттің кәсіпкерлік қызметке қатысуын шектейтін, ағымдағы жылғы сәуір айында қабылданған «Бәсекелестік туралы» заңда көрініс тапқан «Yellow Pages» («Сары беттер») қағидалары алынды. Бұл жөнінде БАҚ өкілдеріне берген сұхбатында «Экономикалық зерттеулер институты» Кәсіпкерлікті дамыту орталығының директоры Нұрлан Құлбатыров мәлім етті. Ұлттық экономикадағы мемлекеттік үлесті азайту және мемлекеттік активтерді жекешелендірудің екінші толқыны жайында кеңінен айтылған әңгіме барысында жаңа құрылымдық экономикаға көшу тек жекелеген компаниялардың ғана емес, сонымен қатар, тұтас салалардың қызмет ету тиімділігін арттыруды талап ететіндігі қозғалды. Бүгінгі жекешелендірудің негізгі мақсаты мемлекеттік активтерді барынша тиімді меншік иесіне өткізу жолымен еліміздің жеке бизнесінің одан әрі дамуына жаңа қарқын беру болып табылады. Әлемдік тәжірибе жекешелендірудің шығындарды азайтуға алып келетіндігін және өндірісті басқару сапасын арттыратындығын көрсетіп отыр. Бұл ретте жекешелендіру үрдістерін іске қосу мақсатында Үкімет компанияларды бәсекелес ортаға беру үшін екі тәсіл ұсынады. Оның біріншісі - кейбір ең ірі активтер тікелей сату арқылы немесе IPO және SPO тетіктері бойынша қор нарығына шығару жолымен стратегиялық инвесторларға, оның ішінде 2018 жылғы 1 қаңтарға дейін «Астана» халықаралық қаржы орталығының алаңында (AIFC) іске асырылады. Ал екіншісі басқа компаниялар аукционда немесе компанияларға жеке инвестор қатысар болса, тікелей сату тәсілдерін пайдалану арқылы сатылады. Белгілі болғандай, аукцион арқылы сатылым кезінде сауда-саттық санына шектеу қойылады. Бұдан әрі бірінші сауда-саттық ағылшын әдісі бойынша бағаны көтеру арқылы жүргізіледі. Егер нысан қызығушылық тудырмаса, онда екінші және үшінші сауда голландтық тәсілмен бағаны түсіру арқылы жүзеге асады. Үш рет сауда жүргізгеннен кейін сатып алушылар болмаған жағдайда, нысан таратылуға жатады. Сонымен қатар, бәсекелестік ортаға берілетін компаниялардың сатылатын активтерінің қызмет бағытын сақтау - басты талап ретінде қарастырылған. ***
«Айқын» газетінің жазуынша, осыдан 6 ай бұрын өртенген Адем-1 сауда орталығының кәсіпкерлері мен меншік иелері енді Елбасы Нұрсұлтан Назарбаевқа Үндеу хат жазып, көмек сұрамақ. Осымен төртінші рет баспасөз жиынын өткізіп отырған топтың ендігі мақсаты АТФ Банктің «Алматы 21 век» ЖШС жүргізген барлық келісімдерін банк заңнамасы талаптарының сақталғанына негізді күдік тудыратын келісім ретінде тексеруге қол жеткізіп, АТФ Банк әкімшілігінің өз құрылтайшылары, банк салымшылары мен салық төлеушілер алдында есеп беруін талап етпек.
Бұрынғы қаржы дағдарысы уақытында (2007-2008 жылдар) ел банктеріне көмек ретінде бөлінген қаражат Қазақстан Республикасының салық төлеушілері есебінен берілгенін ескерсек, бұндай жүгіну қазіргі каржы дағдарысы кезінде өте өзекті. Осыған дейін кәсіпкерлердің негізгі шағымдары өртке оранған сауда орталығының меншік иесі «Алматы XXІ век» ЖШС-на бағытталып келген еді. Енді нысанның АТФ банкпен арадағы барлық келісімдерінде банк талаптарының сақталғанына күдік келтіріп отыр. Өйткені 2014 жылдың 18 наурыз күні №114 сатып алу шарты бойынша «Алматы XXІ век» ЖШС мен АТФ басшысы арасында 8 000 000 000 (сегіз миллиард) теңгеге келісім жасалған. Адем-1-дің АТФ ақшасына сатып алынғанын, несие үшін кепіл ретінде жер телімдерімен бірге «Адем-3» сауда үйі де кепілге қойылғанын «Алматы XXІ век» ЖШС заңгері Д.Сәрсенбаев мырза 2015 жылдың 10 шілде күні Алматыда өткен конференцияда айтқан. Енді осы нысанның меншік иелері жәбірленушілер алдында өтемақы төлеуі қажет. Бұл жайында «Адемнің» жыры біткен жоқ» деген мақаладан толық оқи аласыздар.
Осы басылымда «Қайта оралған жәдігер» атты мақала берілген. Алматы қаласының Орталық мемлекеттік мұрағатында Қазақ хандығының 550 жылдығына орай «Қайта оралған жәдігерлер» атты көрме ұйымдастырылып, дөңгелек үстел өтті. Шараға жоғары оқу орындарының студенттері мен тарихшылар жиналды. «Мәдени мұра» мемлекеттік бағдарламасы аясында Орта Азия мен Қазақстан аймағынан табылып алыс, жақын шетел мұрағаттарына өтіп кеткен құжаттардың көшірмелері әкелінген. Бұл құжаттарда Орта Азия және Қазақстанның географиялық жағдайы, осы аймақтың тарихи-мәдени ескерткіштері, қазақтардың тұрмыс-тіршілігі, аңыздары, ондағы тарихи өзгерістер туралы мәліметтер берілген және сол жердің табиғатына жан-жақты ғылыми талдаулар жасалынған. XIX ғасыр мен XX ғасырдың басында батыс елдердің зерттеушілері мен саяхатшылары Орта Азия мен Қазақстан аумағына жүргізген ғылыми экспедициясы кезінде түсірген «TURKESTAN» альбомы және «Жетісу» ескерткіштері атты суреттер топтамасы ерекше орын алады. Тақырыпқа орай «Таңбалы мемлекеттік тарихи-мәдени және табиғи қорық мұражайы» өзінің «Тарихтың түпқазығы - Таңбалы» және де «Республикалық кітап мұражайы» - «Қазақ хандығына 550 жыл» атты кітап көрмелерін алып келді.
***
«Ана тілі» газетінің соңғы санында «Абай сыйлығы табыс етілді» деген материал берілген. Ақын, Халықаралық «Алаш» әдеби сыйлығының иегері Ғалым Жайлыбай «РУХ» меценаттар клубы тағайындаған «Абай» сыйлығының тұңғыш иегері болды. Бұл сыйлықты «Хұснихат» әдебиетті қолдау қоры ұйымдастырған «Бір өлең, бір әуен» атты әдеби-сазды кеште М.О.Әуезов атындағы Әдебиет және өнер институтының директоры, ҚР Ұлттық Ғылым академиясының корреспондент-мүшесі Уәлихан Қалижан табыстады. Бұл сыйлық сонымен қатар Абайдың өлеңдері мен қара сөздерін, Мұхтар Әуезовтің шығармаларын қытай тіліне аударған Сібе ұлтының жазушысы Ха Хуанчжанға да табыс етілді.
-0-
Руслан Ғаббасов