Әділет министрлігі мәжбүрлеп орындату нәтижелерін жариялады

АСТАНА. KAZINFORM – Мәжбүрлеп орындатуды мемлекеттік және жеке сот орындаушылар, сондай-ақ оңайлатылған іс жүргізу шеңберінде цифрлық сот орындаушылар жүзеге асырады. Бұл жөнінде ҚР Әділет министрлігі Мәжбүрлеп орындату комитетінің төрағасы Мақсат Балабеков Орталық коммуникациялар қызметінде өткен брифингте мәлімдеді.

– Өткен жылы аталған сот орындаушылар 15,5 триллион теңгелік 10 миллионға жуық құжатты қарады. Өндіріп алушылардың пайдасына өндірілген сома – 557,6 млрд теңге. Бұл 2024 жылмен салыстырғанда, 88,6 миллиард теңгеге жоғары. Мемлекеттік кіріс ретінде 63,4 миллиард теңге өндірілді. Бұл көрсеткіш 2024 жылмен салыстырғанда 10%-ға өсті, - деді ол.

Сонымен қатар М. Балабеков 2025 жылға қатысты басқа да статистикалық мәліметтерге тоқталды.

– Мемлекеттік сот орындаушылар мен мемлекет пайдасына 3,4 млрд теңге атқарушылық санкция өндірілді. Бұл көрсеткіш 2024 жылдан 30%-ға өсті. Цифрлық сот орындаушысы оңайлатылған іс жүргізу арқылы 10 млрд теңгеге жуық қаржы өндірді. Оңайлатылған өндіріс шеңберінде жеке сот орындаушысының қызметіне 25% төлем төленбейтінін ескерсек, азаматтар 2,4 млрд теңге қаражатын үнемдеді, - деді ол.

Айта кетейік бұған дейін Парламент Мәжілісінде алимент өндіріп алу жөніндегі құжат қаралатынын жазғанбыз.