Ахмади Мақанов Швециядағы супер турнирдің чемпионы атанды

АСТАНА. KAZINFORM – Қазақстандық теннисші Ахмади Мақанов Стокгольм қаласында 14 жасқа дейінгілер арасында Tennis Europe супер турнирінде үздік шығып, Швеция королінің кубогын жеңіп алды.

Ақтөбе теннис мектебінің түлегі, 13 жастағы А.Мақанов ширек финалда Tennis Europe рейтингісінде 2-орында тұрған грекиялық Рафаэль Пагонисті жолдан тайдырды – 6:4, 6:2.

Жартылай финалда жарыстың 4-ракеткасы, украиналық Юрий Столяровтың мысын басты – 6:2, 6:4. 

Қазақстандық теннисші тартысты өткен соңғы бәсекеде Tennis Europe рейтингісінде 10-сатыдағы франциялық Самуэль Дакасеннің меселін қайырды – 6:2, 6:7, 6:3. 

Kungens Kanna & Drottningens Pris додасында 2015 жылы Тимофей Скатов озық шыққан еді.

Онда қазақстандық спортшы финалда ұлыбританиялық Джек Дрейперді 6:4, 6:2 есебімен ұтқан болатын. 

Ахмади Мақанов – Швеция королінің кубогын жеңіп алған, толықтай Қазақстанда дайындалған алғашқы ойыншы. Ахмади қазіргі кезде Team Kazakhstan академиясында жаттығады. 

Швеция королінің кубогы үшін Kungens Kanna & Drottningens Pris турнирі 1901 жылдан бері өткізіліп келеді. Кезінде мұнда әлемнің экс 1-ракеткасы, «Үлкен дулыға» турнирінің 11 дүркін чемпионы, швециялық Бьорн Борг жеңімпаз атанған еді. Сондай-ақ осы турнирде Стефанос Циципас, Каспер Рууд, Джек Дрейпер және басқа атақты теннисшілер ойнады.

Еске сала кетейік, бұдан бұрын жас теннисші Ахмади Мақанов туралы не білетінімізді жазған болатынбыз.