Аида Балаева қолөнершілер ең көп шоғырланған өңірлерді атады

АСТАНА. KAZINFORM – Мәдениет және ақпарат министрі Аида Балаева креативті индустрияны цифрландыруға арналған Үкімет отырысында қолөнершілер ең көп шоғырланған өңірлерді атады.

- Қолөнершілер саны бойынша көш бастап тұрған қалалар: Алматы – 1 , Астана – 1 349, Шымкент – 1 254, Түркістан облысы – 969. Сонымен қатар ЖШС-лардың 40%-ы IT саласына тиесілі, - деді министр.

Оның сөзінше, Қазақстандағы креативті секторларда 143 600 адам жұмыспен қамтылған.

- Бүгінгі таңда Қазақстандағы креативті индустрия 12 бағыт бойынша дамып, 43 экономикалық қызмет түрін қамтиды. Елімізде креативті индустриямен айналысатын, тіркелген субъектілер саны 45 597, ал олардың ел экономикасындағы жалпы қосылған құн үлесі 1%. Креативті индустрия субъектілерінің 50%-дан астамы Алматы мен Астанада шоғырланған, ал олардың 70%-ы жеке кәсіпкерлер. Бағыттар бойынша ең көп шағын және орта бизнес субъектілері «халықтық кәсіпшілік» бағытына тиесілі – 12 660, - деді Аида Балаева.

Былтыр күзде Қазақстан креативті индустриялардың әлемдік рейтингінде 28 позицияға көтерілгені айтылған еді.