Ақ түтек боранда жолда қалған азаматты құтқарып қалған ауыл әкімі марапатталды
ОРАЛ. KAZINFORM – Батыс Қазақстан облысы Сырым ауданы Жосалы ауылдық округінің әкімі Батырғали Иманқұлов Мемлекеттік қызмет істері агенттігінің төрағасы Дархан Жазықбайдың алғыс хатымен марапатталды.
Агенттік Төрағасы табиғат сынақтар тұсында қиындыққа тап болған қоғам мүшелеріне мемлекеттік қызметші ретінде қолдау көрсетіп, азаматтық ұстаным және батыл іс-қимыл танытқаны үшін алғыс білдірді.
Батырғали Иманқұлов биыл 6 ақпаннан 7 ақпанға қараған түні ақ түтек боранда трактормен қар құрсауында қалып, ауылға қарай жаяу шығып бағытынан жаңылысып қалған азаматқа дереу көмекке барып, ауылға аман-есен жеткізген. Мемлекеттік қызметшінің ерлігінің арқасында азаматқа уақытылы көмек көрсетілді.
«Агенттік төрағасының арнайы жолдаған алғыс хатын Батыс Қазақстан облысы бойынша аумақтық департаментінің басшысы, Әдеп жөніндегі кеңес төрағасы Мұрат Байсалов табыстады», - делінген хабарламада.
